'Skietvoorval ongelukkig'

Francoise SteynbergDie minister van die omgewing en toerisme beskou die skietvoorval waarin die driejarige Alexia Keil gewond is, as “ongelukkig” en verseker toeriste dat Namibiese nasionale parke veilig is.Die minister, mnr. Pohamba Shifeta, sê dit is 'n ongelukkige voorval en 'n sensitiewe en ingewikkelde saak wat deeglik en met deursigtigheid ondersoek moet word.“Ons het teenstrydige stories van die familie en die veiligheidsmagte, maar die waarheid sal seëvier. Ek kan nie nou enige van die betrokke partye blameer voor die ondersoek nie afgehandel is nie,” het die minister gesê.Die goeie nuus is dat Alexia, wat op 15 Maart in die Bwabwata Nasionale Park na bewering deur sekuriteitsmagte van die teenstropery-eenheid in die kop geskiet is, uit die hospitaal ontslaan is nadat 'n stuk koeël tydens 'n operasie uit haar voorkop verwyder is. “Ons dank God dat geen lewensverliese gely is nie. Dit is 'n wekroep vir ons dat dit nie herhaal mag word nie. Dit is nie ons wens om sulke voorvalle in ons nasionale parke en elders in die land te sien nie,” het Shifeta gesê.Volgens hom het mnr. Harald Keil, sy vrou Teresa en dogters Alexia en Caitlyn (2), die Buffalo-gebied in die park op 12 Maart besoek. Die parkreëls en -regulasies en die teenwoordigheid van die eenheid is by die toeristesentrum aan hulle verduidelik, sê Shifeta. Die gesin het die park weer op 15 Maart besoek en hulle het te kenne gegee dat hule die reëls ken. “Drie skote is die oggend gerapporteer in die omgewing van Pica-pau en Nova in die Buffalo-gebied, voetspore is gesien en daar is vermoed dat olifante in die park gestroop is,” het Shifeta gesê. Die teenwoordigheid van die teenstropery-eenheid is versterk en 'n mobiele padblokkade is opgerig. “Omstreeks 15:00 het die patrolliespan, geklee in volle uniform en met 'n regeringsvoertuig langs die pad geparkeer, die Keil-familie in hul Toyota Fortuner gestop. Hulle het hulself voorgestel, die redes vir die padblokkade gegee en Keil gevra om die voertuig te deursoek.”WAARSKUWINGSKOTEShifeta sê dit was toe dat Keil weggery het en die patrolliespan waarskuwingskote geskiet het, maar die voertuig het nie gestop nie.“Die volgende skoot is op die regteragterwiel geskiet wat die band laat bars het, maar die bestuurder het op die velling van die wiel aanhou ry. Drie ander skote is op die wiele van die voertuig geskiet, maar die voertuig het nie gestop nie.”Volgens die minister het die gesin verby die Buffalo-toeristesentrum gery waar hulle nie gestop en die skietery gerapporteer het nie. Hulle het eers by die Divundu-polisiepunt gestop waarna 'n weermag-ambulans die beseerde Alexia na Andara-hospitaal geneem het. Shifeta sê daar gaan meer kennisgewingborde in Bwabwata en ander nasionale parke opgerig word om besoekers oor die reëls, regulasies en operasies in parke in te lig. Op 'n vraag of Namibië in Botswana se voetspore gaan volg wat stropers voor die voet doodskiet, het Shifeta geantwoord dat hy nie ander lande bespreek nie, maar “veiligheidsmagte kom op 'n punt waar hulle sê genoeg is genoeg”.Die minister sê die veiligheidsmagte leef in moeilike toestande in parke en kan soms gefrustreerd en paranoïes raak, “maar hulle weet wat hulle mag en nie mag doen nie”.Shifeta het gesê daar is Maandagnag nóg 'n olifant in Bwabwata deur gewapende verdagtes gestroop. Een verdagte is in hegtenis geneem.“As jy op die weermag skiet, verklaar jy oorlog. Die wapens en ammunisie wat stropers, moontlik voormalige, goed opgeleide soldate gebruik, is gevaarlik en kan 'n weermag soldate toerus. Dit is nie 'n grap nie.”

'Skietvoorval ongelukkig'

Kommentaar

Republikein 2026-08-03

Meld asseblief aan om kommentaar te lewer

'Skietvoorval ongelukkig'

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.