Skedelkuspark word ‘n waterpark

Ronelle Rademeyer - In ’n geskiedkundige hoogtepunt van die reënseisoen het al sewe die riviere suid van die Kunenerivier wat deur die Skedelkus Nasionale Park vloei en in die Atlantiese Oseaan uitmond, die see verlede week bereik.Dié riviere is die Khumib, Hoarusib, Hoanib, Unjab, Koigab, Huab en die Ugab.Die Kunenerivier se vlak styg die afgelope dae ook merkbaar. Joernalis Tanja Bause wat saam met vriende ’n toer van Wild Skeleton Coast Adventure Tours meegemaak en by die monding van die Kunenerivier gaan visvang het, sê dit het elke dag dieper en sterker gevloei.Op hulle terugpad al langs die Skedelkus af na Hentiesbaai, moes hulle ure lank voor die Hoarusibrivier wag dat dit afloop voordat hulle kon deurry. Sy sê van die mans in die toergeselskap het eers deurgeloop en toe beduie hoe die voertuie moet ry om veilig die ander oewer te bereik.“Die Hoanibrivier het klomp klein sytakke op pad see toe gemaak. Een van die sytakke het die pad tussen Terracebaai en Möwebaai erg verspoel,” sê sy.Die toerleier, mnr. Johan Burger, sê die Hoanibrivier het sowat 15 jaar gelede laas die see bereik. “Al die rivier loop. Dit is baie spesiaal; ’n ou sien dit nooit nie. Hier is verskriklik baie water in die woestyn. Dit is baie mooi om te sien,” het hy in ’n video-onderhoud gesê.Die Ugab-hek in die Skedelkus Nasionale Park in was vir ’n tyd gesluit toe die Ugabrivier in die see geloop het, maar is intussen weer vir voertuie wat daarlangs beweeg.Binneland toe is die pad tussen Uis en Khorixas een van talle wat verlede week deur die Paaieowerheid vir verkeer gesluit is. Dié gedeeltelik vanaf die brug oor die Ugabrivier tot by Khorixas is steeds gesluit, aangesien die water die pad by die brugoorgang weggekalwe het.Die organisasie Elephant Human Relations Aid (EHRA) het die naweek foto’s op Facebook geplaas van die voerwoestende skade aan hul basiskamp sowat 50 km vanaf Uis.“Dit is ‘n absolute nagmerrie. ‘n Vloed het EHRA se basiskamp uitgewis. Ons is uiters geskok,” sê die organisasie in sy plasing.’n Voertuig en sleepwa is 300 m ver deur die vloedwater meegesleur toe die pad in ’n rivier verander het, en is tot by die stuurwiel onder die modder begrawe, sê EHRA. -ronelle@republikein.com.na

Skedelkuspark word ‘n waterpark

Kommentaar

Republikein 2025-12-15

Meld asseblief aan om kommentaar te lewer

Skedelkuspark word ‘n waterpark

Kommentaar

Republikein 2025-12-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.