Simpatie is nie empatie

Niemand in die samelewing is dieselfde nie.

God het ons almal anders geskape met verskille in voorkoms, persoonlikheid en ervarings.

Party mense het negatiewe ervarings gehad wat deel geword het van dit wat hulle daagliks moet hanteer.

Dit lyk egter of ons almal mense probeer verander volgens ons eie beperkte idee van wat normaal is in plaas daarvan om ons verskille te vier.

Mense met gestremdhede, geestesiektes of skaars siektes soos akute alopesie word dikwels verwerp, gestigmatiseer en teen gediskrimineer.

Party het reeds aan die name, geskinder en kyke gewoond geraak wat hulle daagliks ervaar, maar niks is erger as diskriminasie wat as bejammering verdoesel word nie.

Die bekende radiopersoonlikheid Olivia Christians het in ’n onderhoud oor haar ervaring met akute alopesie gesê sy haat bejammering oor haar kondisie meer as enigiets.

Die toestand veroorsaak dat sy al die hare op haar lyf en kop verloor.

Christians is moeg vir mense wat vra of sy lesbies, transgender of ’n man is.

Bejammering is egter die ding wat sy die meeste haat – selfs meer as die oningeligte, onvanpaste en pynlike opmerkings wat mense haar toesnou.

Mense moet weet wat die verskil tussen empatie en bejammering is – veral met iemand wat deur iets soos akute alopesie gaan, wat hul selfbeeld en selfvertroue raak en geestesiektes soos depressie kan veroorsaak.

Die wanopvatting bestaan ook dat mense met geestesiektes fisiek gestrem is of sekere take nie kan verrig nie.

Hulle ervaar selfs by die werk diskriminasie wat agter ’n masker van simpatie weggesteek word. Hulle word van sekere take verskoon wat hulle dalk selfs beter as hul kollegas kan verrig.

Mense behandel hulle anders as ander mense, en dit kan hulle minder menslik laat voel.

Kom ons besef wat die verskil tussen bejammering en empatie is.

Empatie is wat nodig is. Dis wanneer jy jouself in ander se skoene plaas sonder om op te tree of hulle reeds dood is, sonder om hulle te ontneem van al die potensiaal wat hulle het.

Empatie behels om te probeer verstaan waardeur die ander persoon gaan sodat jy kan help waar nodig en hulle nie in ’n “skande”-boksie druk nie.

Kom ons gaan voort om grappies met hierdie mense te deel, saam met hulle te lag, en hulle poetse te bak sonder om hulle te bejammer, soos wat ons sou doen voor ons ontdek het hulle is effe anders as die res van ons.

Kom ons raak ontslae van al die vooroordele, stereotipering en afsondering van ander net omdat hulle nie aan ons iddee van “normaal” voldoen nie.

Ons is almal deur God geskape om ’n doel op hierdie planeet te hê.

Kom ons raak van al die bejammering ontslae.