Shilongo speel in CAF Kampioeneliga

Andrew Poolman - Namibië se internasionale doelskieter Benson Shilongo staan voor 'n opwindende uitdaging sedert sy aansluiting by die kragtige Egiptiese sokkerklub Ismaily kort voor die Nuwejaar.Volgens nuusberigte beloop die waarde van die transaksie van Shilongo se werwing van sy vorige Egiptiese klub, Smouha Alexandra, nagenoeg 4.5 miljoen Egiptiese pond (N$3.56 miljoen).Die 26-jarige Brave Warriors-speler, wat ook in Suid-Afrika vir Platinum Stars gespeel het, is bestem om CAF Kampioeneliga-sokker in die kleure van Ismaily te speel.Tydens laas Vrydag se loting vir die CAF Kampioeneliga is Ismaily in groep C saam met die vyfmalige kontinentale wenners TP Mazembe (DRK) geplaas, wat juis op 11-12 Januarie hul eerste teenstander sal wees. Die ander twee opponente in die groep is CS Constantine (Algerië) en Club Africain (Tunisië). Twee spanne uit elke groep vorder na die kwarteindronde.Shilongo was die eerste aanwins wat Ismaily gedurende die winter bekom het om sy aanvallende voorhoede te versterk, het die klub in 'n nuusverklaring gesê.Hy vervang die Nigeriese voorspeler Okiki Afolabi wie se kontrak opgeskort is.Shilongo speel reeds vir elf maande in die Egiptiese liga vandat hy in Januarie 2018 by Pyramids en later Smouha aangesluit het. Hy was ook 'n waardevolle speler vir Alassiouty Sport (864 minute in 13 wedstryde).Shilongo is een van die senior lede van Namibië se nasionale Brave Warriors-groep met 13 internasionale verskynings en het die afgelope seisoene met 'n paar waardevolle doele vorendag gekom.Ismaily (gestig in 1924) staan ook op die bynaam “die Brasiliane van Egipte” bekend vanweë hul soortgelyke uitrusting en die vernuftige, aanskoulike speelstyl waarvoor hulle bekend geword het. Van die klub se trotsste oomblikke was toe hy in 1969 die CAF Kampioeneliga gewen het en in 2003 in die eindstryd verloor het. Dit was ondanks die feit dat hy tradisioneel derde in die ry staan ná Egipte se twee reuse, Al-Ahly en El Zamalek. Boonop moet Ismaily maar gereeld vrede daarmee maak wanneer die twee groter klubs van die hoofstad Kaïro sy beste spelers wegrokkel.Shilongo se nuwe klub bevind hulle egter tans aan die onderpunt van die puntelys in die Egiptiese premierliga en sal graag in die oorblywende wedstryde verlore eer wil herwin.MANNETTI IN SY SKIKDie Brave Warriors se afrigter, Ricardo Mannetti, sê Shilongo is 'n rolmodel vir menige jong sokkerspeler in Namibië – veral diegene uit die omgewing van sy geboorteplek Ongwediva.“Vir Benson om sy sokker te gaan beoefen in 'n land met 'n ander kultuur en godsdiens is nie maklik nie. Hy het uit sy gemaksone beweeg en dit is baie indrukwekkend. “Op die speelveld het hy so volwasse geraak en ek is nie baie verbaas deur die nuus van sy nuutste bevordering nie, want ek het hoë agting vir sy vermoëns. Ek wens hom alle voorspoed toe as 'n ambassadeur van Namibië.“Ek weet ook dat hy vanjaar vir ons baie werd gaan wees gedurende ons oorblywende kwalifiserende wedstryde vir die 2019 Afrika Nasiebeker-toernooi.”

Shilongo speel in CAF Kampioeneliga

Kommentaar

Republikein 2025-05-12

Meld asseblief aan om kommentaar te lewer

Shilongo speel in CAF Kampioeneliga

Kommentaar

Republikein 2025-05-12

Meld asseblief aan om kommentaar te lewer

MELD AAN

Advertensie