Shannon forensies aan vingerafdruk uitgeken
Vingerafdrukke toon dit was die vermiste Shannon Wasserfall se oorskot wat gevind is.
Ronelle Rademeyer – Die oorskot wat verlede Dinsdag ná 'n SMS-leidraad in 'n vlak graf tussen die duine naby Walvisbaai gevind is, ís dié van die vermiste me. Shannon Darlikie Wasserfall.
Komm. Nelius Becker, hoof van die Namibiese polisie se Instituut vir Forensiese Wetenskap (NPSFI), het Maandagaand aan Republikein bevestig sy kon met 'n vingerafdruk geïdentifiseer word.
Becker sê die vingerpunte van vier vingers was sodanig behoue dat vloeistof onder die vel ingespuit en 'n gedeeltelike vingerafdruk bekom kon word. Dit stem ooreen met die vingerafdrukke wat vroeër vir doeleindes van haar identiteitsdokument geneem is.
Volgens hom maak die ontleding van bewysstukke soos die klere wat in die graf gevind is, ook deel van die uitkenningsproses uit.
Die 22-jarige Wasserfall was sedert 10 April vermis. 'n Vrou wie sy geken het, me. Azaan Madisia (28), het Vrydag in die landdroshof op Walvisbaai op klagte van moord en regsverydeling verskyn.
Becker het verduidelik die DNS-roete is nie gevolg nie aangesien die instituut in die proses is om na 'n nuwe gebou met nuwe, supermoderne laboratoriums te verhuis. Die instrumente waarmee die DNS-toetse gedoen word, moet van nuuts af gekalibreer word.
Verder wou die instituut nie die reagense wat nodig is om die toetse mee te doen, bestel voor die nuwe laboratorium nie in werking is nie. “Die reagense verval binne 21 dae en een besending, wat net genoeg is vir 40 toetse, kos N$1,6 miljoen. Die ou laboratorium is al twee maande toe en ons kon nie in die tussentyd sulke duur voorraad dra wat verval nie,” verduidelik Becker.
Hy sê reagense en die ander verbruiksitems soos pipette en chemikalieë wat nodig is om die toetse te doen, is vroeër die week by Thermo Fischer Scientific, wat in Suid-Afrika handel dryf as LTC Tech, bestel.
“Dit duur agt weke om die bestelling vir reagense voor te berei en aan ons te lewer.”
Volgens Becker is daar 'n agterstand van 1 800 DNS-toetse wat gedoen moet word wanneer die nuwe laboratorium in werking is. Teen meer as N$35 000 per toets, beteken dit die NPSFI benodig N$63 miljoen om die agterstand uit te wis.
“Mense is onbewus van die koste van DNS-toetse. Hulle dink dit is N$10 'n toets, maar dit is hoogs gesofistikeerd.”
Becker sê die ongunstige wisselkoers beïnvloed ook die koste.
Hy sê die instituut skakel by sy nuwe laboratorium ook oor na 'n papierlose radiofrekwensie identifikasiestelsel (RFID) om die forensiese proses te verfyn.
– [email protected]
Komm. Nelius Becker, hoof van die Namibiese polisie se Instituut vir Forensiese Wetenskap (NPSFI), het Maandagaand aan Republikein bevestig sy kon met 'n vingerafdruk geïdentifiseer word.
Becker sê die vingerpunte van vier vingers was sodanig behoue dat vloeistof onder die vel ingespuit en 'n gedeeltelike vingerafdruk bekom kon word. Dit stem ooreen met die vingerafdrukke wat vroeër vir doeleindes van haar identiteitsdokument geneem is.
Volgens hom maak die ontleding van bewysstukke soos die klere wat in die graf gevind is, ook deel van die uitkenningsproses uit.
Die 22-jarige Wasserfall was sedert 10 April vermis. 'n Vrou wie sy geken het, me. Azaan Madisia (28), het Vrydag in die landdroshof op Walvisbaai op klagte van moord en regsverydeling verskyn.
Becker het verduidelik die DNS-roete is nie gevolg nie aangesien die instituut in die proses is om na 'n nuwe gebou met nuwe, supermoderne laboratoriums te verhuis. Die instrumente waarmee die DNS-toetse gedoen word, moet van nuuts af gekalibreer word.
Verder wou die instituut nie die reagense wat nodig is om die toetse mee te doen, bestel voor die nuwe laboratorium nie in werking is nie. “Die reagense verval binne 21 dae en een besending, wat net genoeg is vir 40 toetse, kos N$1,6 miljoen. Die ou laboratorium is al twee maande toe en ons kon nie in die tussentyd sulke duur voorraad dra wat verval nie,” verduidelik Becker.
Hy sê reagense en die ander verbruiksitems soos pipette en chemikalieë wat nodig is om die toetse te doen, is vroeër die week by Thermo Fischer Scientific, wat in Suid-Afrika handel dryf as LTC Tech, bestel.
“Dit duur agt weke om die bestelling vir reagense voor te berei en aan ons te lewer.”
Volgens Becker is daar 'n agterstand van 1 800 DNS-toetse wat gedoen moet word wanneer die nuwe laboratorium in werking is. Teen meer as N$35 000 per toets, beteken dit die NPSFI benodig N$63 miljoen om die agterstand uit te wis.
“Mense is onbewus van die koste van DNS-toetse. Hulle dink dit is N$10 'n toets, maar dit is hoogs gesofistikeerd.”
Becker sê die ongunstige wisselkoers beïnvloed ook die koste.
Hy sê die instituut skakel by sy nuwe laboratorium ook oor na 'n papierlose radiofrekwensie identifikasiestelsel (RFID) om die forensiese proses te verfyn.
– [email protected]
Kommentaar
Republikein
Geen kommentaar is op hierdie artikel gelaat nie