Sewesspan bly terugsak op Afrika-lys

Andrew Poolman - ’n Teleurstellende eerste dag het meegebring dat Namibië nie in die tophelfte van die kompetisie kon klaarmaak by Rugby Afrika se kontinentale sewesrugbykampioenskap die afgelope naweek in Monastir, Tunisië nie.Die Namibiërs onder kapteinskap van Aurelio Plato het in hul twee groepwedstryde eers met 26-19 teen Madagaskar verloor, voordat Zambië hulle ook met 28-7 gestuit het.Gister op die finale speeldag het afrigter Les Bougard se manne met 14-0 teen Botswana gewen en daarna die uitspeelwedstryd vir die negende plek met 24-14 teen Ghana gewen.Die twee topspanne in die toernooi, afgesien van Kenia, dring deur na April volgende jaar se Hongkong-sewes en kan daar ’n plek in die HSBC Wêreldsewesreeks oopspeel. Die Namibiërs het egter lelik vasgeval en het kommerwekkend teruggesak ná die tweede plek wat die span onder afrigterskap van Jurie Booysen twee jaar gelede in Nairobi in die Afrika-toernooi behaal het.Die tipe foute wat die Namibiërs op beide die aanval én verdediging begaan het, getuig opnuut daarvan dat die land eenvoudig nie sy onaktiwiteit op die kontinentale en internasionale sewestoneel te bowe kan kom nie. Kondisionering het te kort geskiet, terwyl die span sekerlik ook kon gebaat het uit die ondervinding van sommige van die sewe spelers wat klaarblyklik om rugbyredes, eerder as tugstappe, weggelaat is nadat hulle vir ’n Griekwas uitnodigingspan aan die Zambië-sewes gaan deelneem het.Op die tweede wedstryddag het dit beter gegaan, maar ooglopend gaan dit geld, vernuf en moeite kos om die seweskodes naastenby op dieselfde vlak van mededingendheid as die vyftienmanspel te bring.In die nederlaag teen Madagaskar het Shareave Titus en Chad Plato drieë gedruk, maar die eilandspan het sake teen rustyd gelykop met 12-12 gemaak. ’n Laat drie deur Camlo Martin was ook te min en te laat om vir nog twee verdoelde Madagaskar-drieë in die tweede helfte te vergoed.In die Zambië-wedstryd was die Namibiërs rustyd met 14-0 agter. Hul enigste opflikkering was kort ná rustyd, toe Lloyd Jacobs ’n beweging afgerond het wat in sy eie kwartgebied begin het.Teen die buurland Botswana gisteroggend was drieë deur Chad Plato en Daniel Bock genoeg om ’n oorwinning met 14-0 te beklink.Ter afsluiting teen Ghana gister het die Namibiërs vanaf die eerste afskop hul stempel afgedruk toe Chad Plato die afskop raakgevat en deur die verdediginglyn versnel het om agter die pale te gaan afrond. Sy broer Aurelio se doelskop was mis.Ghana het kortstondig die voortou geneem (7-5) met ’n netjiese verdoelde drie deur een van hul aanvallende uitblinkers – een van verskeie kere in die toernooi waar Shareave Titus nie op die verdediging sy kant gebring het nie.Chad Plato het egter ná ’n tikskop met oortuiging deur nog ’n laagvat geglip vir sy tweede drie, wat Aurelio verdoel het (12-7).Skaars ’n halfminuut ná rustyd het goeie opbouwerk tot Lloyd Jacobs se verdoelde drie agter die pale gelei, voordat Ghana weer met sy spoed ingespan het om terug te slaan (19-14).Namibië het danksy Oderich Mouton se kragdrie die laaste sê gehad, met die doelskop wat van die regoppaal teruggespat het.Namibië se Dion Venter is voor die einde op ’n draagbaar afgedra, toe ’n Ghanese baldraer se knie hom teen die kop getref het. Hy is vir waarneming per ambulans na die hospitaal afgevoer.In die toernooi se finaal gister het Zimbabwe hom goed teëgesit teen Kenia en met 19-5 gewen.

Sewesspan bly terugsak op Afrika-lys

Kommentaar

Republikein 2025-05-20

Meld asseblief aan om kommentaar te lewer

Sewesspan bly terugsak op Afrika-lys

Kommentaar

Republikein 2025-05-20

Meld asseblief aan om kommentaar te lewer

MELD AAN

Advertensie