Sewe renosters gestroop

Francoise Steynberg - Die ministerie van die omgewing en toerisme het gister bevestig dat sewe karkasse van renosters in November in die Etosha Nasionale Park gevind is.

"Dit is bevestig dat al sewe renosters gestroop is," het die woordvoerder van die ministerie, mnr. Romeo Muyunda, gesê.

Dit bring die totale getal renosters wat vanjaar in die land gestroop is op 47 te staan. Volgens die ministerie is altesaam 69 olifante tot dusver in 2016 in Namibië gestroop, waarvan die meerderheid in die Kavango-Oos- en Zambeszistreek.

Die polisie en die ministerie se ondersoek duur voort.

Intussen het die adjunk-inspekteur-generaal van operasies van die Namibiese polisie, genl.maj. James Tjivikua, boere en gemeenskappe om die Etosha Nasionale Park teen stropery, betreding, die knip van die grensdraad en weiding van hul vee in die park gewaarsku.

"Die polisie het die uitdagende taak om meer en meer stropers in hegtenis te neem wat van nedersettings om Etosha kom. Verskeie klagtes en onwettige aktwiteite word van dié nedersettings ontvang," het Tjivikua in ''n nuusverklaring gesê.

Die nedersettings is volgens Tjivikua: Uutsathima, Omutambomawe, Olumelengwa, Ombonde, Onamatanga, wes van Onamatanga, Otjetjekwa, Otjivero, Okatjange, Okomizena en veeposte tussen hierdie nedersettings en die grensdraad van Etosha.

"Boere en ander persone wat betrokke is, moet ophou met stropery. Wildmisdade word deur die polisie as baie ernstig beskou," het Tjkivikua gemaan.

Die polisie en die ministerie herinner die publiek aan die beloning van N$60 000 vir enigiemand wat inligting oor renosterstropery verskaf.