Ses mans vas oor ‘hoogverraad’

Denver Kisting – Die nasionale polisiehoof, lt.genl. Sebastian Ndeitunga, wou nie gister uitwei oor wat presies tot die inhegtenisneming van ses vermeende afstigters gelei het nie.

Adj.komm. Edwin Kanguatjivi, polisiewoordvoerder, het gister gesê dié ses is Sondag buite Katima Mulilo aangekeer.

Al wat Ndeitunga gistermiddag wou sê, was: “Wat ek kan bevestig, is die inhegtenisnemings. Dit is ’n baie ernstige kwessie. Dit druis in teen die gees van die Grondwet.”

Op ’n vraag oor of die mans ten tye van hul inhegtenisneming besig was om te vergader oor hul beweerde planne, het Ndeitunga gesê: “(Dit is mense) wat hulle op die afstigting van Caprivi beroep.”

Intussen het die prokureur-generaal, dr. Albert Kawana, gister opnuut gesê vermeende afstigters is vyande van Namibië.

Dit gaan sy verstand te bowe dat mense ’n gedeelte van ’n soewereine land wil afstig, terwyl hulle die opsie het om hul eie politieke party te stig. “Wie ookal hierdie nasie wil verdeel, is ’n vyand van die Namibiese nasie. As jy die vrede versteur, is jy ook ’n vyand,” het hy by navraag gesê.

Die Grondwet is duidelik oor die grense van die land, sê Kawana. Trouens, sê hy, die beleërde mnr. Mishake Muyongo, wat tydens 1999 ’n afstigoperasie in die Zambezisstreek gelei het, het sélf artikel 1 van die Grondwet geskryf wat die grense van die land duidelik uitstip.

Muyongo is een van die Grondwet-skrywers.

Oor ’n nuusverklaring van die Caprivi Concerned Group (CCG), wat volgens hulle sedert Augustus verlede jaar stof vergader in Kawana se kantoor, sê hy: “Die posisie van die regering oor die kwessie is baie duidelik en ek hoef nie uit te brei nie: Die Zambezistreek is ’n integrale deel van Namibië. Ek weet nie watter gedeelte van Namibië is Caprivi nie.”

Namibiërs mág kragtens die Grondwet hul menings lug, maar die opperwet is ook duidelik oor hóé daardie menings uitgedruk mag word, waarsku Kawana.

Oor die regering wat glo nog nie aan hul versoek voldoen het om ’n vergadering te belê nie, sê die CCG: “Dít is die gesindheid wat mense kan dwing om geweld te gebruik om gehoor te word.”

Kanguatjivi het gister gesê die ses mans verskyn na verwagting vandag in die Katima Mulilo-landdroshof.

Hulle is Sondag aangekeer en staar klagte van sameswering om hoogverraad te pleeg, aanhitsing tot openbare geweld en ’n oortreding van die Grondwet in die gesig.

Hiernaas het die mans, wat tussen 32 en 46 jaar oud is, glo ook die polisie verhinder om hulle werk te doen.

Die presidensiële woordvoerder, dr. Alfredo Hengari, het gistermiddag gesê hulle sal ook oor die kwessie beraadslaag.

Volgens Kanguatjivi is die ses mans omstreeks 09:30 eergister by die Liselo-nedersetting buite Katima Mulilo in hegtenis geneem.

Nampa het vroeër vanjaar tydens die president van Botswana, mnr. Mogweetsi Masisi, se maagdebesoek aan Namibië berig dat hy gesê het sy land beplan om Namibiese vlugtelinge wat by die Dukwi-vlugtelingkamp gehuisves word, huis toe te stuur.

Dié vlugtelinge word verbind met ’n poging tydens 1999 om die destydse Caprivistreek af te stig van die res van die land.

Luidens die Nampa-berig het Masisi sy Namibiese eweknie, dr. Hage Geingob, ingelig hulle beskou nie meer hierdie mense as vlugtelinge nie, maar as onwettige immigrante.

Masisi het voorts gesê sy regering sal voortgaan om op te tree teen onegte vlugtelinge wat – teenstrydig met hul vlugtelingstatus – by politieke bedrywighede in Botswana betrokke raak.

Volgens dié berig het pres. Geingob gesê die rede hoekom sommige mense nie na Namibië wil terugkeer nie, is omdat hulle steeds nie afstand gedoen het van die plan om die hedendaagse Zambezistreek af te stig nie.