Sentrale damme bereik rekordlaagte

Elvira Hattingh - Net sowat 28% (7,333 Mm³) van al die water wat Windhoek per jaar gebruik (26,000 Mm³), kan nog uit die Omatako- en Von Bachdam verhaal word. Terselfdertyd het die driedamstelsel nou die laagste vlak sedert sy ontstaan in die 1970’s bereik.Die damme wat Sentraal Namibië van water voorsien, se gemiddelde watervlakke het nou vir die eerste keer onder 10% gedaal en staan tans op 9,8% of 15,183 miljoen kubieke meter (Mm³) water. Dit is ’n nuwe rekord. Volgens ’n grafiek wat sedert 1978 deur NamWater bygehou is, was die damstelsel vantevore die leegste ná die reënseisoen van 1981-82, toe gesamentlik net sowat 10,2% (15,900 Mm³) water oor was. Selfs ná die droogte van 1996-97, het die damme gesamentlik steeds ’n volume van 20,600 Mm³ water oorgehad.Daarbenewens het NamWater se mnr. André Mostert vroeër vanjaar gesê water uit die Von Bachdam kan net tot op ’n vlak van 2,100 Mm³ getrek word, weens silt wat op die bodem saamgepak het.Dit beteken slegs sowat 7,333 Mm³ van die 9,433 Mm³ water in Von Bach sal nog gebruik kan word, terwyl ’n sekere hoeveelheid water ook nog moet verdamp. Die Von Bachdam staan tans op 19,4%.Die jongste damverslag dui aan dat wateroorplasings verlede week van die Omatakodam na Von Bach asook vanaf die Swakoppoortdam na Von Bach plaasgevind het. NamWater se uitvoerende hoof, dr. Vaino Shivute, het egter onlangs gesê die Swakoppoortdam se water sal ná Julie slegs vir Karibib en die Navachabmyn gebruik word.Dié dam het tans 5,442 Mm³ of 8,6% water oor en kan, volgens die damverslag, tot op ’n vlak van 1,431 Mm³ getrek word.Daarbenewens is die Omatakodam bykans leeg en sal die Von Bachdam binnekort die enigste wees wat die res van Sentraal Namibië van water moet voorsien. Die Omatakodam bevat tans nog 0,7% (0,308 Mm³) water. NamWater sê behalwe vir Karibib en die Navachabmyn, is Okahandja, die Otjihasemyn, die Internasionale Lughawe Hosea Kutako en Waterberg of Okakarara ook afhanklik van die sentrale waterstelsel. Ná die hoofstad, is Okakarara die grootste gebruiker wat jaarliks sowat 2,5 Mm³ water sluk. Teen 25,467 Mm³, gebruik Windhoek egter tienmaal meer water.Windhoek sal voorts toenemend afhanklik raak van waterbesparings asook alternatiewe waterbronne soos die akwifer, water uit die Kombat- en Berg Aukasmyn in die Noorde en herwinde water.

Sentrale damme bereik rekordlaagte

Kommentaar

Republikein 2025-07-17

Meld asseblief aan om kommentaar te lewer

Sentrale damme bereik rekordlaagte

Kommentaar

Republikein 2025-07-17

Meld asseblief aan om kommentaar te lewer

MELD AAN

Advertensie