Seibeb laat die lig praat

Rodney Seibeb het onlangs sy nuwe enkelsnit, “!Nab /Guiba !Hoa”, bekend gestel. Dit beteken “Laat die lig praat”.

Rondey sê die liedjie wys net die Here se lig kan met hom praat.

“As die lig daar is, is alles spontaan, harmonieus en gee vir ons wysheid.

“My vervaardiger, Steven !Naruseb, het die lirieke vir die enkelsnit geskryf. Hy help my té veel – met alles wat ek doen. Hy tree ook tans as my bestuurder op. Sonder hom sal my loopbaan nie so suksesvol wees nie.

“Ons het die Here se lig nou die meeste nodig. Juis weens die finansiële druk waaronder ons gebuk gaan. Ons moet as een nasie saamstaan. Armoede en hongersnood kan ons net met die Here se hulp bekamp.”

Die enkelsnit is tans op YouTube beskikbaar en dit is gratis.

“Aangesien ek met armoede simpatiseer, wil ek hê die liedjie moet vir almal beskikbaar wees.”

Seibeb werk tans aan sy nuwe vollengte album.

“My vollengte album sal einde van September in die land beskikbaar wees. Die album bestaan uit ongeveer 10 oorspronklike liedjies, wat alles deur !Naruseb geskryf is. Die album gaan in winkels en op die internet beskikbaar wees.

“Dis hoog tyd dat die mense van Namibië saamstaam. Ons moet verby kleur kyk en mekaar ten volle ondersteun en voortdurend liefde aan ons medemens toon. Dan sal ons ‘n beter Namibië hê waarin almal gelukkig saam kan woon.

“Die rede waarom daar ook nie genoeg reën is nie, is omdat ons nie saamstaan nie. Unity is power!” sê Seibeb.

Rodney sê hy sing vir sy mense sodat almal kan hoor wat die Here te sê het. Al die musiek op die nuwe album gaan oor God se liefde, die lig en Heilige Gees, sê hy.

“Fokus op die Here,” sê hy.

Vir meer inligting, kontak Seibeb op Facebook, YouTube of stuur ‘n e-pos aan [email protected].