'Sege teen Kanada sal lewens verander'

Uit 22 Wêreldbeker-wedstryde sedert 1999 het Namibië nog geen gewen nie, maar die span is positief oor hul kanse komende Sondag teen Kanada. As hulle dit regkry, sê die senter Darryl de la Harpe, sal dit ’n groot hupstoot vir die sport gee.De la Harpe weet dis alles of niks in Sondag se botsing teen Kanada. Die wen of verloor sal Namibië se deelname aan die 2019 Wêreldbeker definieer en sal heel moontlik die nalatenskap van hierdie Namibiese span bly.Ondanks die land se merkwaardige prestasie om sedert 1999 vir elke Wêreldbeker-toernooi te kwalifiseer, het die Welwitschias nog geen van hul 22 wedstryde gewen nie.De la Harpe (33) hoop om in die Kamaishi-gedenkstadion teen die Canucks vir sy 52ste en moontlik laaste toets gekies te word en hoop dat die land se deurbraakoorwinning in WB-wedstryd nommer 23 sal aanbreek.“Al waaraan ek dink, is om te wen,” het hy op ’n nuuskonferensie in Morioka gesê. “Ek gee nie om hoe nie. Of dit met die laaste skop is, of met 50 punte, wen is al wat tel.”De la Harpe, soos die meerderheid van afrigter Phil Davies se groep, moes van sy voltydse werk in Windhoek, waar hy by sy pa se ingenieursfirma werk, verlof neem om sy land te verteenwoordig. Hierteenoor kan Kanada se spelers nou voltyds oefen met Major League Rugby wat die sport sedert 2018 op professionele vlak na Noord-Amerika bring.De la Harpe glo egter die eenheid en karakter wat gekoester word in die groep met ’n sterk kern van Namibies gebaseerde spelers, sal hulle die voorsprong gee.“Almal van ons werk en sien ons gesinne nie baie gedurende die rugbyseisoen nie, omdat ons op verskillende tye werk en oefen. Ons spankultuur is gebaseer op sulke dinge, op dissipline en opoffering.“Dit sal heel moontlik nie ’n aanskoulike wedstryd wees nie. Dit gaan baie fisiek, baie taai wees, maar ek glo ons span het die karakter daarvoor.”Sewe lede van die groep, onder wie De la Harpe, is ouer as 30 en sal waarskynlik nie in die volgende Wêreldbeker (2023 in Frankryk) speel nie. Tog is 16 van Davies se groep jonger as 25 jaar oud en behoort dan op hul beste te wees.TOEKOMSPADVir die span se aanvalsafrigter Mark Jones, ’n veteraan van 47 toetse insluitend die 2003 en 2007 Wêreldbekers vir sy geboorteland Wallis, reken blootstelling aan topklas opposisie moet ’n wesenlike deel van die Namibiese ontwikkelingsplan vir die toekoms wees.“Uit my ervaring met Wallis, toe ons op ’n meer gereelde grondslag teen die beter spanne van die Suidelike Halfrond begin speel het, het die standaard van ons spelers geweldig gestyg,” het Jones gesê.“Jy verbeter voortdurend jou kennis van die spel; jou besluitneming en kondisionering word onder meer druk geplaas en sulke ontwikkeling is uiters belangrik vir verbetering.“Ons moet dit aan hierdie ouens oordra. Hopelik sal die wêreldwye rugbykalender meer spanne soos Namibië in staat stel om blootstelling teen vlak 1-spanne te kry.”Die meeste van Davies se personeel, insluitend Jones, sal waarskynlik aanbeweeg sodra die Wêreldbeker vir Namibië verby is. Maar ná vyf jaar onder Davies se leierskap is Jones vol vertroue dat Namibiese rugby in ’n opwaartse kurwe is.“Hierdie ouens verbeter voortdurend; hulle stel hoër standaarde en skep ’n beter omgewing vir jong spelers,” sê Jones.Om die vooruitgang vol te hou, weet De la Harpe dat spelers ná hul uittrede die mantel moet oorneem om die volgende generasie te inspireer en te lei, volgens die voorbeeld van sy voormalige spanmaat en nou die nasionale skrumafrigter, Jaco Engels.Maar eers moet Namibië die naweek teen Kanada wen.“As dit gebeur – of wanneer dit gebeur – sal dit baie mense se lewens verander,” sê hy. “Dit sal finansiering, borgskap beteken, en dit kan die katalisator vir vele dinge in Namibië wees. Dit kan die verskil wees vir hierdie kinders wat vir ’n ander Wêreldbeker vir hul land gaan speel.“Die vraag is nie óf ’n sege teen Kanada ’n groot impak kán hê nie. Dit sál ’n groot impak hê.” – rugbyworldcup.com• Vir WB-nuus, tellings en die stand van die groepe, besoek https://rwc.my.na

'Sege teen Kanada sal lewens verander'

Kommentaar

Republikein 2025-11-05

Meld asseblief aan om kommentaar te lewer

'Sege teen Kanada sal lewens verander'

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.