Seas bly in aanhouding

Jessica Botes Die 32-jarige Zenobia Seas wat daarvan beskuldig word dat sy haar dogter versmoor het, is op 20 April borgtog in Swakopmund se landdroshof geweier.In haar uitspraak het landdros Surita Savage nie net haar ontsteltenis oor dié saak uitgespreek nie, maar ook in die algemeen oor die toename in gevalle van huishoudelike geweld.“Elke dag wanneer ons die koerant oopmaak, lees ons van verskriklike huishoudelike geweldmisdade wat gepleeg word, en hierdie een tel as een van die ergste gevalle omdat die beskuldigde, as klein Ava se moeder, veronderstel was om haar weerlose kind te beskerm, maar volgens wat voor die hof geplaas is, het die beskuldigde heeltemal die teenoorgestelde gedoen en die klein meisietjie het met haar lewe betaal,” het Savage in haar uitspraak gesê.Volgens die klagstaat word Seas beskuldig van die moord op haar driejarige dogtertjie, Antonette Amakhoes Owoses, op 26 September 2016, in die omgewing van Hentiesbaai. Sy word van 'n klag van moord in terme van artikel 1 van die Wet op die Bekamping van Huishoudelike Geweld, 4 van 2003, aangekla.Die staatsaanklaer, mnr. Dalon Quickfall, het gesê die staat staan borgtog teen omdat dit nie in die publiek se belang en in die belang van die gereg sal wees nie.Volgens Quickfall het die staat 'n sterk saak teen Seas en die erns van die misdaad mag tot 'n swaar straf lei. Hy het verder geargumenteer dat 'n groot moontlikheid bestaan dat die beskuldigde op die vlug sal slaan of selfmoord sal pleeg indien sy op borgtog vrygelaat word. Die staat vrees ook dat sy met staatsgetuies, veral met familielede, sal inmeng.Seas se regsverteenwoordiger, mnr. Mposikeng Dube, het die hof meegedeel dat die beskuldigde die hulp van 'n sielkundige of psigiater nodig het om haar gemoedstoestand ten tyde van die voorval te bepaal. sielkundigeDie beskuldigde is van mening dat haar grondwetlike reg geskend sal word indien sy nie vrygelaat word om mediese bystand te verkry nie.'n Opvoedkundige sielkundige, me. Estelle Bailey, wat die beskuldigde in die aanhoudingselle besoek het, het getuig dat daar geen rede is dat Seas langer in aanhouding moet bly nie.Die voormalige streeksmisdaadkoördineerder van die Erongostreek, adjunk-kommisaris Otillie Kashuupulwa, het getuig dat daar 'n openbare oproer was omdat 'n onskuldige lewe geneem is.Polisieondersoekbeampte, Izolde Kleinbooi, wat die toneel besoek het, het getuig dat 'n bottel kamferolie op die toneel gevind is en dat in die post mortem bevind is dat die oorledene versmoor is en dat kamferolie in die neusgate gevind is.Sy het verder getuig dat die beskuldigde in haar notaboek, wat ook op die toneel gevind is, beskryf hoe sy die oorledene doodgemaak het en boodskappe aan haar familielede gelaat het. Volgens Kleinbooi het sy uit die notaboek afgelei dat die beskuldigde selfmoord wou pleeg nadat sy die oorledene doodgemaak het'n Maatskaplike werker van Swakopmund, me. Margareth Richter, het getuig dat die ministerie van geslagsgelykheid en kinderwelsyn bewus is van die saak, omdat die beskuldigde 'n vyfjarige dogter het en dat dit in hul mandaat is om na die welstand van die kind om te sien. Sy is gekant teen die toestaan van borgtog omdat dit nie in die belang van die oorlewende kind sal wees nie.In haar uitspraak het die landdros gesê: “Daar is geen twyfel dat die klag wat die beskuldigde in die gesig staar 'n ernstige een is wat gewoonlik 'n ernstige straf met skuldigbevinding opgelê word nie. Maar moenie vergeet van die veronderstelling in die reg dat 'n beskuldigde onskuldig is tot hy of sy skuldig bevind is nie. 'n Hof sal ten gunste van 'n beskuldigde neig, behalwe as daar sterk aanduidings is dat dit geregtigheid moontlik mag benadeel,” het Savage gesê. Sy het verder gesê Seas beplan om na haar tuiste, waar sy saam met haar ouers en kind woon, terug te keer indien sy op borgtog vrygelaat word. Die landdros was van mening dat hierdie reëling dit onmoontlik sou maak om inmenging met getuies te verhoed. Voordat sy borgtog geweier het, het die landdros gesê: “Daar is genoegsame rede om tot die gevolgtrekking te kom dat dit nie in die belang van geregtigheid sou wees om die beskuldigde op borgtog vry te laat nie.”Die verhoor is tot 7 Junie uitgestel vir die polisie om uitstaande mediese en forensiese getuienis te verkry.

Seas bly in aanhouding

Kommentaar

Republikein 2025-12-24

Meld asseblief aan om kommentaar te lewer

Seas bly in aanhouding

Kommentaar

Republikein 2025-12-24

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.