Sclettwein: Afgradering is onregverdig

Estelle de Bruyn - Namibië is nou beter daaraan toe as in Desember toe die kredietgradeerder Moody’s sy laaste gradering van die Namibiese ekonomie gedoen het. Daarom stem Namibië nie met die afgradering na rommelstatus saam nie, het die minister van finansies, mnr. Calle Schlettwein, gister op ‘n nuuskonferensie in Windhoek gesê.Hy sê die staat se salarisrekening is presies dieselfde as wat dit in Desember was.Hy sê Moody's het die Namibiese regering verlede week met ‘n stel vrae oor die finansieringsplan van uitstaande skuld genader. “Ons het aangedui dit sal in die middel van die jaar se begrotingshersiening ingewerk word. Dit het daartoe gelei dat hulle ons afgegradeer het. ‘n Kredietwaardigheidsontleding moes meer aspekte in ag geneem het. Uitstaande rekeninge is belangrik, maar dit is nie 'n aanduiding van 'n swak ekonomie nie. “Ons het die vermoë om al ons skuld te betaal en ons het die likiditeitsprobleme van Desember boonop oorkom. Om ons te oordeel en te sê daar is ‘n probleem met likiditeit is nie reg of waar nie,” het hy verduidelik.Hy meen ook dit was die regte ding vir die ekonomie om klein en medium sakeondernemings, aan wie die regering geld geskuld het, te betaal.“As ons nie betaal het nie, soos Moody's sou verkies het, sou dit katastrofies vir die ekonomie gewees het. Dit was belangrik dat ons die rekeninge betaal. Om te sê dit is 'n bykomende swakpunt, vertel nie die volle verhaal nie,” het Schlettwein gesê.Hy sê Moody's het drie sleutelfaktore waarvolgens hulle die afgradering regverdig. Die staat se inkomste en uitgawes is volgens hulle nie volhoubaar nie. “Toe hulle ons in Desember gegradeer het, het ons reeds skerp aan die begroting gesny. In Desember was Moody's tevrede dat die stappe wat ons geneem het, voldoende was. Hulle het die vooruitsigte as negatief gegradeer en ons het daarmee saamgestem. Die risiko was om inkomste en uitgawes beter te balanseer en ons het dit reggekry,” het hy gesê.Volgens Schlettwein het die omstandighede nie verswak nie en was daar dus nie regverdiging vir 'n afgradering nie.Moody's het ook die land se beperkte vermoë om fiskale skokke te hanteer as rede aangevoer. “Hulle sê ons begrotingstekort en skuldverhouding is kommerwekkend. Dit kom van 2015-'16 toe ons begrotingstekort vergroot is, maar dit was as gevolg van die verkleinde inkomste uit die Suider-Afrikaanse Doeane-unie (SACU). In die volgende jaar is dit van 9,6% tot 6,3% van die bruto binnelandse produk (BBP) afgebring.“Dit wys ons het die regte ding gedoen. Ons het dus verbeter en nie verswak nie.”Volgens Moody’s is daar ook 'n probleem met die regering se likiditeit in die toekoms.Schlettwein sê met die Afrika-ontwikkelingsbank se lening is die land se likiditeitsdruk verlig en kon onbetaalde rekeninge vereffen word.Hy sê likiditeitsrisiko’s is deel van die druk wat op Namibië geplaas is. Hy wys ook daarop dat die ekonomie deur die besnoeiing van ongeveer N$9,5 miljard in die hersiene begroting geraak is. Groot konstruksieprojekte is gestaak en die droogte het die landbousektor negatief beïnvloed. "Daar is 'n argument dat ons ‘n meer agressiewe konsolidasieplan moes volg. Dit kon egter die ekonomie sodanig verswak het dat dienste aan die armes ingeperk sou moes word," het hy bygevoeg.Hy sê die regering beoog ook om die skuldvlak onder 42% te hou en dit selfs tot 35% te verminder.Schlettwein wys daarop dat Namibië se inkomsteverwagting volgens Moody's minder is as wat die regering voorsien. “Ons stem nie hiermee saam nie, want ons inkomste is beter as wat ons verwag het. Die inkomste uit Sacu is volgens Moody's nie gewaarborg nie. "Sacu is inderdaad vanjaar gewaarborg en ons het 'n internasionale verdrag wat bepaal hoe die geld verdeel word. Ons het reeds die eerste twee paaiemente gekry en dit was volgens verwagting,” het hy gesê. Namibië ontvang vanjaar N$4,7 miljard per kwartaal van Sacu.

Sclettwein: Afgradering is onregverdig

Kommentaar

Republikein 2026-05-04

Meld asseblief aan om kommentaar te lewer

Sclettwein: Afgradering is onregverdig

Kommentaar

Republikein 2026-05-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.