Savannah sing vakansielied

Tanja Bause- Die Namibiese musikant Savannah Collins is vanjaar gekies om ’n vakansielied vir Gondwana Collection Namibia te skryf en te vervaardig.

“Ek moes ’n vakansielied skryf wat mense opgewonde oor die vakansie maak en wat Gondwana en hul lodges terselfdertyd bevorder.

“Gewoonlik skryf ek liedjies oor alledaagse dinge – oor hartseer of liefde. Nou moes ek ’n lied skryf wat nie net die maatskappy bevorder nie, maar ook die land, en hoewel dit heeltemal anders as my gewone musiekstyl was, was dit baie maklik en lekker,” het sy gesê.

“Die lied se naam is ‘Namibia’ en ek het dit geskryf sodat ons weer op ons land verlief kan raak. Ongeag die huidige ekonomiese omstandighede bly ons in ’n baie mooi land met wonderlike natuurtonele, mense en oorvloedige wildlewe. Ons is werklik geseënd.

“Die lied is ’n ander sy van my musiek, iets anders as wat mense van my gewoond is. Ek keer terug na akoestiese musiek en dit het meer van ’n country-inslag. Ek speel vir die eerste keer die mandolien.”

Savannah was onlangs op toer in die Suide om ‘n video van dié lied te maak.

“Dit is die eerste keer in my lewe dat ek by die Visriviercanyon, Lüderitz en Aus was. Ek het met my kitaar op die rand van die Visriviercanyon gestaan en gedink ek kan nou maar sterf en hemel toe gaan. Wat ’n besonderse ervaring,” het sy gesê.

Tydens haar toer het Savannah vier van Gondwana se lodges in die Suide besoek, en die Canyon Roadhouse met sy ou voertuie het ’n blywende indruk gelaat.

“Ek is ’n groot liefhebber van die natuur en van diere. By die Klein Aus Vista Lodge het ons die wilde perde gaan soek. Ons het langs die pad gestop en ’n trop perde het aangeloop gekom. Hulle het doodrustig by my verby gestap en ons kon hulle by die video insluit. Dit het baie vir my beteken. Dit was die beste ondervinding in die wêreld. Hulle is so geheimsinnig en spesiaal en ek is bly dat ons hulle kon sien.”

Volgens me. Jescey Visagie van Gondwana het die idee vir die Gondwana-vakansielied in 2015 ontstaan toe dié lied vir die eerste keer opgeneem is.

“Die doel was om ’n platform te skep waardeur die maatskappy hul getroue kliënte vir hul ondersteuning gedurende die jaar kon bedank,” het sy gesê.

Die eerste lied was getiteld “Holiday” en was deur die Suid-Afrikaanse groep The Professors geskryf en uitgevoer.

Die daaropvolgende twee jaar het die Namibiese kunstenaars Ees en Farmaz Attack die vakansielied geskryf en opgeneem.

Die video vir “Namibia” sal aan die begin van Desember op al Gondwana se sosialemediaplatforms en YouTube bekend gestel word.