Sasol se VSA-aanleg raak laat

Francois Williams – Die voltooiing van die petrochemiese reus Sasol se chemiese aanleg in Amerika is nou tot vyf maande vertraag weens verskeie faktore soos swak weer, byvoegings tot die projek en afwesigheid van werkers.Aandeelhouers hou nie van die nuus nie, en sy aandeelprys was Vrydag 5% laer op R390.Sasol sê in ’n nuwe handelsverslag die kraker-eenheid by die aanleg in Lake Charles in die Amerikaanse deelstaat Louisiana kan nou eers in Julie voltooi word. Daar was aanvanklik verwag dat dit in Februarie voltooi sou wees. Die laedigtheid polietileen-eenheid sal in Augustus klaar wees teenoor Maart. Ander eenhede in die projek is van ’n maand tot vier maande vertraag.Die projek gaan ook nou duurder kos as verwag, teen tussen $11,6 miljard en $11,8 miljard, vergeleke met die vroeër kosteberaming van $11,13 miljard.Swaar reën in die laaste kwartaal van 2018 het bouwerk met ’n maand vertraag. Daar was produksieverliese weens werkers wat weggebly het rondom openbare vakansiedae en weens sekere bouwerk wat sedert einde November oorgedoen moes word.Ingenieursbeplanning wat onvolledig was en nie betyds geïdentifiseer is nie, het tot laat byvoegings tot die ontwerp van die kraker gelei, en ekstra werk was nodig om die veiligheid van die kraker- en die etileenoksied-eenhede te verseker nadat foutiewe staalgietsels ontdek is.Sasol spog wel dat sy liniêre laedigtheid polietileen-eenheid reeds in Januarie sy eerste produkte gelewer het, en dit sal in Februarie, sowat twee maande laat, in kommersiële produksie wees.Ander eenhede van die projek sal teen November, Desember en in Januarie 2020 voltooi wees.Sasol sê hy is steeds oortuig van die Lake Charles-projek se sakeplan want dit gaan hoëwinsmarge-produkte van wêreldgehalte lewer. Hy verwag egter die aanleg sal vir die volle boekjaar ’n verlies van tussen $165 miljoen en $185 miljoen ly vergeleke met ’n verdienste van tot $160 miljoen wat vroeër verwag is. Teen 2022 sal die aanleg egter ’n verdienste van $1,3 miljard lewer.Sasol sê die projek is in totaal 95% klaar en $10,9 miljard is tot dusver daaraan bestee.Sasol sê hy sal sy halfjaarsyfers teen 25 Februarie bekend maak.Ondanks al die slegte nuus verwag Sasol ’n effens beter verdienste per aandeel vir die halfjaar tot einde Desember as wat hy in November verwag het.Ondanks al die slegte nuus verwag Sasol ’n effens beter verdienste per aandeel vir die halfjaar tot einde Desember as wat hy in November verwag het.Hy verwag nou ’n styging van tussen 110% en 114% in sy verdienste per aandeel vergeleke met ’n jaar gelede. In November het hy verwag die verdienste per aandeel sal tussen 80% en 100% hoër wees.Die verbetering is danksy aanpassings in waardasies teen die halfjaareinde wat verband hou met wisselkoerse en die verskansing van ruolie-pryse.Sasol verwag sy verdienste voor rente, belasting, depresiasie en afskrywing sal wel steeds binne dieselfde band styg as wat hy in November verwag het - dit sal met tussen 8% en 16% oftewel tot tussen R26 miljard en R28 miljard groei teenoor ’n jaar gelede se R24,2 miljard.Die rand-dollarwisselkoers was teen die einde van die halfjaar tot einde Desember 16% swakker op R14,36 teenoor die R12,37 waar dit ’n jaar gelede was. Die gemiddelde wisselkoers was 6% swakker op R14,20 teenoor R13,40 in die ooreenstemmende halfjaar.Die gemiddelde Brent-ruolieprys in dollar was 26% hoër in die tydperk, op $71,33 per vat teenoor $56,74 per vat.Sy raffineringsmarge in dollar per vat was 2% laer op $9,49. – Netwerk24

Sasol se VSA-aanleg raak laat

Kommentaar

Republikein 2025-05-01

Meld asseblief aan om kommentaar te lewer

Sasol se VSA-aanleg raak laat

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie