Sasol se markwaarde val met R31 miljard

JJ van Wyk en Francois Williams - Beleggers moes Maandag met skok toekyk hoe Sasol meer as R31 miljard van sy waarde verloor toe sy aandeelprys met 10,8% geval het tot R432,52 ná ’n winswaarskuwing.Weens die laer oliepryse en laer aardgaspryse in Noord-Amerika, moes Sasol die waarde van sy skaliegasbates in Kanada met R11,5 miljard afskryf; hy het gewaarsku die koste van sy beplande uitbreiding by Lake Charles in Louisiana, Amerika, kan met byna US$3 miljard tot US$11 miljard styg; en sy opbrengs uit die projek sal minder wees as verwag. Die ekstra kapitaalkoste is sowat 15% van Sasol se markwaarde, het Devan Schutte, uitvoerende hoof van MyWealth Investments, op Twitter gesê, en op grond hiervan kan die aandeelprys nog tot R415 val.Die petrochemiese reus, die wêreld se grootste produsent van brandstof uit steenkool, het gewaarsku sy wins vir die boekjaar tot einde Junie kan met tussen 10% en 30% krimp.Enige beweging in Sasol se aandeelprys kan ’n impak hê op die waarde van mense se aftreegeld. Die Openbare Beleggingskorporasie, wat staatsdienswerkers se pensioenfonds bestuur, besit 12,1% van Sasol se uitgereikte aandele, volgens Sasol se 2015-jaarverslag.Ander groot batebestuurders wat namens kliënte Sasol-aandele hou, sluit in Allan Gray met 8,9% van Sasol se aandelekapitaal, Sanlam Beleggingsbestuur met 2,7%, Old Mutual Batebestuur met 2,6% en Coronation met 2,1%.Internasionale batebestuurders soos Black Rock (3,1%), Vanguard (2,6%) en Allianz Global Investors (2,4%) is ook groot Sasol-aandeelhouers.Sasol het volgens Bloomberg in Desember die waarde van sy belang in die Montney-skaliegasveld in Kanada met R7,4 miljard afgeskryf, en sal nog R4,1 miljard moet afskryf weens die prys van aardgas wat sedert Julie met 12% gedaal het. Die prys van Brent-ruolie het in dieselfde tydperk met 20% gedaal. Sasol se inkomste is regstreeks verbind aan dié prys.Sasol het ook bekend gemaak die koste van die ontwikkeling van sy aanleg in Lake Charles in Louisiana, waar hy aardgas in chemiese stowwe sal omskakel, kan tot US$11 miljard toeneem – teenoor die US$8,1 miljard wat vroeër genoem is.Sasol hersien tans die Lake Charles Chemicals Project (LCCP) omvattend ná vroeë aanduidings dat die koste om die projek te voltooi, “onder druk is”.Voorlopige bevindings is dat die projekkoste tot US$11 miljard kan eskaleer. Huidige aanduidings is dat die kostestyging meestal aan bouvertragings toegeskryf kan word. Dit word veroorsaak deur hoër as verwagte reënval, hoër arbeidskoste, van die groot kontrakte se bodpryse wat hoër is as verwag en meer boumateriaal wat benodig word as wat aanvanklik geraam is.Sasol se stadiger kapitaalbesteding tot Junie 2018, deel van sy reaksieplan weens die lae olieprys, het ’n langer projekskedule tot gevolg gehad en het bygedra tot verdere kostestygings. Sasol het teen 30 April vanjaar al US$4,5 miljard aan LCCP bestee en die projek is meer as 40% voltooi.Die projek, wat uit ’n etaan-brekingsaanleg bestaan, behoort in die tweede helfte van 2018 in bedryf te wees. Sasol het gewaarsku die verwagte opbrengs van die projek is laer weens veranderde prysaannames op lang termyn en die groter kapitaalbesteding.Die projek sal steeds uit bestaande leningsgeriewe en kontantvloei gefinansier word. - Netwerk24

Sasol se markwaarde val met R31 miljard

Kommentaar

Republikein 2025-08-05

Meld asseblief aan om kommentaar te lewer

Sasol se markwaarde val met R31 miljard

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie