San-gemeenskap op Drimiopsis betoog

'n Groep San-vroue en -meisies van Drimiopsis onder die leierskap van die Women's Leadership Centre in die Omahekestreek het verlede week 'n vreedsame optog gehou waartydens hulle 'n versoekskrif aan die polisie se streekbevelvoerder en die goewerneur van die Omahekestreek oorhandig het. Die optog volg nadat me. Anna Geinamses op 1 Augustus op Drimiopsis vermoor is. Drie weke nadat sy as vermis aangemeld is, is haar lyk in 'n drein gevind naby die huis van die man wat van haar moord verdink word. Dieselfde man is glo dieselfde naweek deur die gemeenskap betrap toe hy probeer het om 'n kind te verkrag. Weens die erns van die misdade het die groep saam met gemeenskapsleiers die versoekskrif oorhandig waarin hulle eis die verdagte word nie op borgtog vrygelaat nie. Hulle eis ook dat die man wat in hegtenis geneem is omdat hy glo me. Martha Hendrik se nek op 24 Julie in Gobabis gebreek het, nie op borgtog vrygelaat word nie. “Ons het gesien hoe baie mans wat op borgtog vrygelaat word weer dieselfde misdaad pleeg,” het die groep in die versoekskrif gesê. “Hulle is 'n gevaar vir die veiligheid van die vroue en meisies van die gemeenskap. Ons eis geen borg word aan vermeende verkragters en moordenaars toegestaan nie.”Magdom van klagtesDie groep het hulle frustrasie met die polisiekantoor op Drimiopsis uitgespreek. “Ons moet wag vir die polisie van Gobabis as daar iets gebeur. Dit lei tot 'n vertraging in sake en omdat daar geen polisie op Drimiopsis teenwoordig is nie, is geweld aan die toeneem,” het hulle gesê en dring daarop aan die polisie moet daaglikse patrollies in die gemeenskap doen. Die groep voel ook die polisie moet die gemeenskap meer gesag gee. “Omdat daar geen polisie teenwoordig in die gemeenskap is nie, het ons die gemeenskapspolisie wat die eerste reaksiespan is wanneer daar iets gebeur. Ons eis die gemeenskapspolisie moet opleiding van die polisie ontvang vir verskillende situasies, en dat hulle veiligheids- en beskermende toerusting van die polisie ontvang.”Die groep is ook ontevrede met die talle onwettige kroeë en sjebeens wat aan die toeneem is. Dié handelaars is onwettig, want hulle beskik nie oor wettige dranklisensies nie. “Boonop hou kroeë nie by die besigheidsure as dit kom by die verkoop van alkohol soos uiteengesit in fase 3 van die hoktydregulasies nie en verkoop hulle alkohol op Sondae.”Sanitasie Volgens die groep moet hulle die bosse as toilette gebruik omdat daar nie genoeg sanitasiegeriewe op Drimiopsis is nie. “Dit maak vroue en meisies kwesbaar vir moontlike verkragtings, hepatitis E en slange. Ons doen 'n beroep op die dorpsraad om op te tree en spoeltoilette en elektrisiteit aan die gemeenskap te voorsien. Ons versoek die regering om ons te ondersteun met die nodige hulpbronne sodat ons ons eie toilette kan bou.” Ten slotte eis hulle die regering moet verantwoordelik gehou word vir die veiligheid van die meisies en vroue van die gemeenskap.

San-gemeenskap op Drimiopsis betoog

Kommentaar

Republikein 2026-02-04

Meld asseblief aan om kommentaar te lewer

San-gemeenskap op Drimiopsis betoog

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.