Salini-werkers terug by werk

Catherine Sasman - Die ongeveer 400 stakende werkers van Salini Namibia op die Neckartaldamprojek het gister hul werk hervat en die maatskappy het onderneem om dié week met vakbondleiers van die Metaal- en Verwante Werkersunie (Manwu) te vergader. Salini se woordvoerder, mnr. Gilles René Castonguay, het Sondag in ’n verklaring gesê Salini Namibia het verwag dat werksaamhede op die bouterrein na normaal sou terugkeer nadat die polisie Saterdagaand die hofbevel aan die stakende werkers oorhandig het wat die ingang na die bouterrein versper het.Castonguay het gesê die maatskappy is tevrede met die hof se uitspraak teen die “oortreders van hierdie onwettige staking”. “Dit spyt ons nogtans dat dit nodig was dat die maatskappy gedwing was om dit van die hof te vra oor kwessies wat maklik deur middel van samesprekinge opgelos kon word,” het Castonguay gesê. Die werkers het tot verlede Vrydag gesê hulle sal aanhou staak totdat die maatskappy die bestuurder van nywerheidsbetrekkinge, mnr. Michaelino Kadikwa, afdank. Kadikwa is steeds in sy pos. Lede van die vakbond en afgevaardigde amptenare van die ministerie van arbeid, nywerheidsbetrekking en werkskepping het tot láát verlede Donderdagaand oor hul griewe en eise vergader. Die ministerie se amptenare het Vrydag ook met die Salini-bestuur byeenkom en na verwagting sal ’n verslag oor hierdie onderhandelinge later deur die ministerie bespreek word.Die minister van landbou, water en bosbou, mnr. John Mutorwa, het Donderdag in die Nasionale Vergadering (NV) herhaal dat die Neckartaldam ’n baie belangrike en strategiese nasionale projek is en onderstreep dat die partye moet saamwerk om hul geskille uit te pluis. Die sekretaris-generaal van die Nama Tradisionele Leiersvereniging (NTLA), mnr. Lazarus Kairabeb, het intussen gesê hy is “stomgeslaan deur die loutere arrogansie van die Italianers” wat dink dat hulle ernstige arbeidsprobleme met ’n hofuitspraak kan uitklaar. “Salini dink deur mense deur middel van dreigemente met ’n hofuitspraak te dwing, gaan hy die probleme oplos. Hierdie mense (Salini) het ’n verskriklike adviseur wat dink probleme sal só weggaan. Hulle verstaan eenvoudig nie dat mense hulself net weer gaan herorganiseer en hulle terugbetaal nie,” het Kairabeb gesê.

Salini-werkers terug by werk

Kommentaar

Republikein 2025-07-01

Meld asseblief aan om kommentaar te lewer

Salini-werkers terug by werk

Kommentaar

Republikein 2025-07-01

Meld asseblief aan om kommentaar te lewer

MELD AAN

Advertensie