Salini-werkers staak

Catherine Sasman - Bouwerk op die Neckartaldam-projek is gister tot stilstand geruk nadat nagenoeg 100 stakende, Namibiese werkers toegang tot die perseel sowat 25 km buite Keetmanshoop geblokkeer het.Die Italiaanse kontrakteur van die projek, Salini Namibia, het gistermiddag gesê die werkers, wat blykbaar onwettig staak, het reeds vroeg die dag die ingangshek met ’n ketting en slot gesluit. “Die betogers het werkers en verskaffers wat nie deel van die staking is nie verhoed om die perseel binne te gaan of te verlaat. Salini Namibia is nie in staat om werk op die terrein te hervat tot die betogers toegang daartoe toelaat nie,” het Salini Namibia se woordvoerder, mnr. Gilles René Castonguay, gesê. Die werkers eis dat die bestuurder van nywerheidsbetrekkinge , mnr. Michael Kadikwa, afgedank word omdat hy glo nie sy werk doen om arbeidsverhoudinge te verbeter nie. “Ons gaan staak totdat hy hier weggaan,” het ’n verteenwoordiger van die Metaal- en Verwante Werkersunie (Manwu), me. Emmie Jansen, gister gesê. Sy het ook gesê die werkers verwag ook dat aan hul ander eise voldoen moet word voordat die staking beëindig gaan word.Die werkers sê hoewel daar van hulle is wat bevorder is, kry hulle nie nuwe kontrakte of aangepaste salarisse nie. Volgens Jansen word baie van hierdie bevorderings slegs mondeling gedoen en dat Namibiese werkers se kontrakte ná ses maande summier beëindig word sonder enige evaluering of regverdigings.Werkers dring ook aan op beter gesondheid- en veiligheidsmaatreëls. Jansen sê baie werkers het longprobleme ontwikkel sedert hulle daar werk weens die oormatige stof van die bouery, maar dat Salini weier om iets daaraan te doen.Die werkers kla ook oor salarisverskille onder personeel met dieselfde kwalifikasies, ervaring of ampstitels.“Ons gaan voor die ingangshek sit totdat aan ons eise voldoen is,” het Jansen gesê.

Salini-werkers staak

Kommentaar

Republikein 2025-09-17

Meld asseblief aan om kommentaar te lewer

Salini-werkers staak

Kommentaar

Republikein 2025-09-17

Meld asseblief aan om kommentaar te lewer

MELD AAN

Advertensie