Sale se Springbokke op pad SA toe

Jacques Nienaber, die Springbok-afrigter, sal straks in die stilligheid in sy noppies wees dat die Sale Sharks die afgelope naweek hul halfeindstryd teen die Exeter Chiefs in die Engelse Premierliga verloor het.
Vier van die spelers in Nienaber se uitgebreide groep vir die toetsreekse teen Georgië en die Britse en Ierse Leeus – Faf de Klerk, Coenie Oosthuizen en die Du Preez-broers Dan en Jean-Luc – was in Sale se beginspan in hul nederlaag van 30-40.
Al drie Sale se drieë is deur Suid-Afrikaners aangeteken – een deur Dan du Preez en twee deur Rohan Janse van Rensburg.
In die ander halfeindstryd het Harlequins die Bristol Bears met 43-36 verslaan.
Die eindstryd tussen die Exeter Chiefs en Harlequins word eerskomende Saterdag op Twickenham in Londen gespeel.
Nienaber sal egter nog moet wag voordat hy vir Cheslin Kolbe en Rynhardt Elstadt beskikbaar sal hê om by die oefengroep aan te sluit. Hul Franse span, Toulouse, het tot die eindstryd van die Top14-liga deurgedring deur vir Bordeaux-Begles Saterdag met 24-21 te klop.
Toulouse se teenstander is La Rochelle, wat Vrydag vir Racing92 met 19-6 getroef het. Dis ’n herhaling van die Europese Kampioenebeker-eindstryd, wat Toulouse met 22-17 gewen het.
Die eindstryd word eerskomende Vrydag in die Stade de France in Parys gespeel.
– Netwerk24


FOTO
Die Springbok-buksie Faf de Klerk in aksie vir die Sale Sharks teen die Exeter Chiefs in Saterdag se Premierliga-halfeindstryd. Foto Getty Images