SADC-visbedryf werk saam

Augetto Graig - Suider-Afrikaanse lande berei hulle tans voor vir samewerking om visserye in die streek te bestuur, akwakultuur te bevorder en visvoorraad te monitor. Die tegniese komitee oor visserye vir lede van die Suider-Afrikaanse Ontwikkelingsgemeenskap (SADC) het onlangs in Windhoek vergader.Dr. Moses Maurihungirire, uitvoerende direkteur van die Namibiese ministerie van visserye en mariene hulpbronne, het verlede Woensdag terugvoering hieroor verskaf. Maurihungirire het gesê die stand van visvoorrade is bespreek, asook die toepassing van SADC-protokol op visserye.Dié protokol verskaf riglyne vir die bestuur van die visbedryf in die streek. Volgens leweringsyfers het Angola in 2017 die meeste vis gevang – ’n hele 414 359 metrieke ton. Namibië en Suid Afrika volg kort op Angola se hakke. Wat akwakultuur betref, het Zambië die voortou geneem met 32 000 metrieke ton, gevolg deur Madagaskar. Die besluit is geneem om akwakultuur te bevorder om sodoende ’n groter bydrae tot voedselsekuriteit te lewer, en aangesien wilde vis-bronne maksimaal benut is. Namibië se minister van visserye en mariene hulpbronne, mnr. Bernard Esau, sal na verwagting binnekort die handves onderteken vir die totstandkoming van ’n mariene monitering-, beheer- en toesigsentrum in Maputo, in Mosambiek. Die SADC se tegniese raadgewer oor visserye, dr. Motseki Hlatshwayo, sê 13 lidlande het aan die vergadering deelgeneem. Angola, Seychelle en Madagaskar het dié 37ste byeenkoms nie bygewoon nie. Hlatshwayo het benadruk geen oorbenutting van visbronne is in die streek gevind nie. Trouens, die lewering van vis in die streek het die afgelope vyf jaar verbeter, danksy die beter bestuur en herstel van visvoorrade in waters rondom die subkontinent, het hy gesê. Wat akwakultuur betref, het lewering die afgelope twee tot drie jaar toegeneem van sowat 56 000 metrieke ton tot die huidige 110 000 metrieke ton.Volgens hom is ’n verbetering in SADC-burgers se deelname aan vissery-aktiwiteite ook goeie nuus. “Meer mense is aktief in die sektor en geleenthede word geskep. Ons het ook ’n studie oor die deelname van vroue en die jeug onderneem. Hulle moet aangemoedig word om aan geleenthede in die visbedryf deel te neem. Ons probeer wys die visbedryf is net so belangrik soos ander om dit gewild te maak. Ons besef die finansiële uitdagings en het banke reeds hieroor genader,” het hy gesê.

SADC-visbedryf werk saam

Kommentaar

Republikein 2025-05-08

Meld asseblief aan om kommentaar te lewer

SADC-visbedryf werk saam

Kommentaar

Republikein 2025-05-08

Meld asseblief aan om kommentaar te lewer

MELD AAN

Advertensie