Saam lag is intiemer as seks

En noudat ek almal se aandag het: Voorspoedige 2020!Aangesien hierdie uitgawe van Republikein die eerste van die nuwe jaar en nuwe dekade is, skop ons hom sommer af met ’n knal. ’n Oerknal. Volgens my is beide lag en seks oerknalle – want watter beter manier is daar nou vir jou heelal/nuwe jaar/nuwe dekade om te ontplof as met lag of seks? Nuwejaarstyd is mos tyd vir lyste en lyste vervelige Nuwejaarsvoornemens wat nooit nagekom word nie – almal wil gewig verloor, almal wil meer geld maak, gesonder leef, gelukkiger wees, ophou rook, blablabla . . . mind blowing . . . gaap.Maar aangesien ons ons nou in ’n jaar bevind wat klink of dit baie helderder, unieker en anderster as ander jare moet wees, wat van ons benader dit sommer ook anders as ander jare? Wat van ons doen meer van die intiemste ding wat mens met jou klere aan kan doen saam met ander mense – lag?Soos in ernstig. Volgens sciencedirect.com versterk lag groepsbande, en speelsheid bevorder samewerking. Maar menshealth.com gaan ’n stappie verder en sê mense is ook baie meer geneig om intieme besonderhede met ander te deel wanneer hulle saam lag – selfs met vreemdelinge. Volgens Alan Grey, ’n navorsingsassistent aan die University College of London se Instituut van Kognitiewe Neurowetenskap, stel jy endorfiene vry elke keer as jy saam met iemand lag. Dit laat jou ontspan en laat jou voel of dit nie so ’n risiko is om jou intieme besonderhede met ander te deel nie. Uiteindelik kom jy nie eers agter jy maak jouself kwesbaar nie, sê hy. “Wanneer jy (met ander) lag, skuif die aandag weg van jouself af,” het Gray aan die manstydskrif gesê. “Deur op iets anders te fokus, is jy minder geneig om bekommerd te wees dat jy weird of onaanvaarbaar voorkom.”Navorsing het in die verlede ook getoon hoe meer intieme besonderhede jy van jouself deel, hoe intiemer raak jou verhoudings. Hoe meer jy dus iemand laat lag, of saam met iemand lag, hoe groter die kanse op intimiteit. Van allerhande soorte.My punt is: Seks gebeur baie makliker tussen mense wat lekker saam kan lag, maar indien seks nie ’n moontlikheid of ’n sprankel in enigiemand se oog is nie, is lekker lag soms selfs lekkerder en intiemer as seks.Volgens exploringyourmind.com noem die Eskimos liefde maak/seks/skaakspeel/whatever jy dit wil noem, “saam lag”.Is dit nie beautiful nie? Dit haal die simpel skaamte en skuldgevoelens oor die onderwerp daaruit en beskryf hoeveel pret intimiteit tussen mense is.So, as een van jou Nuwejaarsvoornemens dalk was om meer seks te hê, begin deur meer te lag.Dis makliker as gewig verloor, ophou rook, minder drink en meer geldmaak. Dis veral makliker as om van jou skuld ontslae te raak. Dit kos niks, dis goed vir jou maagspiere, samewerking, dit bou bande en kweek vertroue tussen mense en gee jou boonop geen snaakse siektes nie.En wie weet waarnatoe dit nog kan lei. Mag 2020 van vandag af vir jou vol baie snaakse grappies wees!

Saam lag is intiemer as seks

Kommentaar

Republikein 2025-11-04

Meld asseblief aan om kommentaar te lewer

Saam lag is intiemer as seks

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.