SA: Topboere van jaar aangewys

Maricelle Botha – Andrew Jordaan van Cradock in die Oos-Kaap is Dinsdag in Bloemfontein aangewys as Voermol se Skaapboer van die Jaar en Patrick en John Eustace van Underberg in KwaZulu-Natal as Voermol se Beesboer van die Jaar.Dit is die 16de keer dat die Beesboer van die Jaar gekies is en die 15de keer die Skaapboer van die Jaar.Waardetoevoeging, die optimale benutting van tegnologie en goeie bestuur van natuurlike hulpbronne het vanjaar se finaliste onderskei, sê dr. Buks Olivier, veekundige en een van die beoordelaars.Jordaan, van die plaas Spekboom, boer met merino’s en dormers. Dié familieboerdery waar hy saam met sy pa, Andrew, en sy broers, Wilhelm en Ginkel, boer, gee die pas aan in die skaapbedryf deur onder meer al 30 jaar lank laparoskopie te gebruik om ooie te insemineer. Tesame met grondige voedingspraktyke en bestuursbeginsels bereik die boerdery ’n lampersentasie van tot 170.“My hart klop buite my bors van trots. Ons is geseënd, al die harde werk het nou geseëvier,” sê Jordaan.“Sonder almal wat daagliks by die plaas se bedrywighede betrokke is, sou ek nie die sukses behaal het nie.”Hy beskou dié prys as die hoogste eer in dié bedryf. “Ek besef ek sal nog harder moet werk, want prestasies hou nooit op nie. Jy moet aanhou met wat jy doen en steeds probeer verbeter, anders stagneer jy.”Jordaan glo jy moet aanhou leer en by ander boere kers opsteek, dié kennis kombineer en jou boerdery dan so verder uitbou.Die gedugte Eustaces, ’n pa-en-seun-paar van die plaas Moyeni, boer met Brahmaan- en Herefordkruisings, bekend as die Braford.John, die seun, gebruik soms kunsmatige inseminasie, maar andersins die beste bulteelmateriaal wat hulle kan bekom. In hul Brafordkudde word Brahmaanbulle gebruik. Herefordbulle word by die Brahmaan-tipe koeie gebruik, terwyl die Hereford-tipe koeie deur Brahmaanbulle gedek word.“Ons is baie hoog in die Drakensberg geleë. Dit kan baie koud raak, so ons moet met goeie gehalte diere teel wat die toestande kan verduur. Ons voel die Braford is gehard vir dié uitdagende omstandighede,” sê John.Daar is twee dinge waaroor die wenboere saamstem: Die noodsaak van die onderlinge ondersteuning in ’n familieboerdery, en betrokkenheid by die gemeenskap.Jordaan meen daar is mense wat die politiek hanteer en dat jy jou eerder met kwessies nader aan jou moet bemoei. “Ek dink dit is belangrik om om te sien na die mense rondom jou. Jou bure, jou gemeenskap, jou dorp. As die gemeenskap opgehef word, trek almal voordeel daaruit.”John glo ook die enigste manier om die politieke druk op landbouers te verlig, is om by die onmiddellike gemeenskap betrokke te raak. “Deur ander te help om by landbou betrokke te raak, staan jy jou plek as kommersiële boer in die landbouketting vol.”Die naaswenners in die skaapboerafdeling is Henry du Plessis van Waaifontein, Kareedouw, en Andries Greyling van Humania, Vrede. In die beeskategorie was dienaaswenners Peter-John Hassard van Silvasands, Hluhluwe, en Mark Anderson van Briarlea, Underberg. – Netwerk24

SA: Topboere van jaar aangewys

Kommentaar

Republikein 2026-05-05

Meld asseblief aan om kommentaar te lewer

SA: Topboere van jaar aangewys

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.