SA riller begin draai

Die langverwagte Suid-Afrikaanse misdaadriller op almal se lippe, Nommer 37, word hierdie naweek uiteindelik in Suid-Afrikaanse flieks vrygestel, nadat dit reeds groot opslae oorsee gemaak het. “Ek hoop alle Suid-Afrikaners gaan hierdie fliek kyk, want die tema is universeel terwyl hulle ook meer sal sien van ’n wêreld wat aan die meeste van ons onbekend is. Teen die tyd wat fliekgangers die bioskoop verlaat, sal hulle vermaak en verras voel, en dalk ook sommer lus wees om ’n verkyker aan te skaf,” sê Nosipho Dumisa, regisseur en draaiboekskrywer, oor haar debuutspeelfilm.Nosipho is ook medevervaardiger van die gewilde kykNET-sepie Suidooster.Hierdie Kaapstadse produksie, wat aan die wêreld bekend gestel is tydens die internasionale SXSW-rolprentfees in Texas, is ook gekies om die land verder by die 18de jaarlikse Internasionale Neuchâtel Fantastic-rolprentfees (NIFFF) in Switserland, vanaf 6 tot 14 Julie te verteenwoordig. Onlangs is aangekondig Dark Star Pictures het eksklusiewe regte bekom om die fliek in Noord-Amerika te versprei.Die Noord-Amerikaanse vertonings sal in New York en Los Angeles begin, waarna dit ook vroegwinter op ’n DVD-op-aanvraag-basis vrygestel sal word. Reel Suspects het ook verspreidingsregte vir die rolprent in China, Duitsland, Oostenryk, Switserland en Japan bekom. Nommer 37 is op die Safta-bekroonde kortfilm met dieselfde naam gebaseer, waarvan Nosipho Dumisa en Travis Taute die regisseurs was. Dit speel af in ’n fiktiewe woonstelblok, Haven Mansions, in haar weergawe van ’n buurt op die Kaapse Vlaktes. Dit vertel die verhaal van Randal Hendricks (Irshaad Ally) wat onlangs deur ’n ongeluk gestrem gelaat is en nou rolstoel- woonstelgebonde is. Hy is kniediep in die skuld by ’n sosiopatiese geldskieter met die naam Emmie (Danny Ross), wat sy pond vleis eis. Wanneer sy toegewyde meisie, Pam (Monique Rockman), vir hom ’n verkyker present gee, kan hy sy bure dophou en dan sien hy op ’n dag hoe ’n gevaarlike bendeleier, Lawyer (David Manuel), ’n moord pleeg.Hy besluit om hom vir geld af te pers. Met verraad en gierigheid om elke hoek en draai neem die gebeure wat volg hulle op ’n lewensgevaarlike reis, soos wat die wêreld rondom hom verder en verder in chaos gedompel word.Sandi Schultz, Deon Lotz, Elton Landrew, Ephraim Gordon en Luke Jansen is ook in die fliek te sien. Dit is deur Bradley Joshua en Benjamin Overmeyer van Gambit Films saam met XYZ Films vervaardig.“Dala Wat Jy Moet”, ’n treffende kletsrymverwerking wat geïnspireer is deur die leefstyl op die Kaapse Vlaktes, is die eerste enkelsnit van die fliek se klankbaan wat vrygestel is. Dit is baie goed ontvang en is deur die Kaapse kletsrymer, Youngsta CPT, geskep saam met Irshaad Ally, die fliek se manlike hoofrolspeler. Die snit spog met ’n tipiese kletsrymritme en ’n konstante meesleurende refrein wat nie net perfek by die genre van die fliek pas nie, maar ook bydra tot die opbouende spanning. ’n Inspirerende musiekvideo met die boodskap dat jy net suksesvol kan wees in die lewe as jy kies om bo jou omstandighede uit te styg, is ook pas uitgereik. Nommer 37 is ’n spanningsbelaaide grootskerm-ervaring, wat kykers op die punte van hul stoele sal hou tot die laaste toneel.Die fliek is deur Gambit Films in samewerking met kykNET Films, M-Net, XYZ Films en die departement van handel en nywerheid (DTI) vervaardig. Dit word plaaslik op 1 Junie 2018 deur Ster-Kinekor Entertainment vrygestel.

SA riller begin draai

Kommentaar

Republikein 2025-08-04

Meld asseblief aan om kommentaar te lewer

SA riller begin draai

Kommentaar

Republikein 2025-08-04

Meld asseblief aan om kommentaar te lewer

MELD AAN

Advertensie