‘SA kan binne 2 jaar uit rommelstatus kom’

Hanlie Stadler - Suid-Afrika kan binne twee jaar weer op beleggingsgraad wees – mits ekonomiese groei en fiskale maatstawwe soos staatskuld as persentasie van bruto binnelandse produk verbeter.Kevin Lings, hoofekonoom van Stanlib, het die naweek op Twitter gesê dis “binne die volgende twee jaar haalbaar”.Sy reaksie kom nadat Standard & Poor’s Global Ratings (S&P) sy gradering van Suid-Afrika se staatskuld Vrydagnag onveranderd gelaat het en ook die vooruitsig onveranderd op stabiel gelaat het.S&P gradeer staatskuld in rand op BB+, een vlak onder beleggingsgraad, en staatskuld in buitelandse geldeenhede op BB, twee vlakke onder beleggingsgraad.Fitch Ratings gradeer alle staatskuld op BB+, een vlak onder beleggingsgraad. Fitch besluit binne die volgende paar weke oor sy gradering.Moody’s Investors Service is die enigste gradeerder wat staatskuld nog op beleggingsgraad het. Dis in die middel van Oktober op Baa3, die laagste beleggingsgraad op Moody’s se skaal, gehou.Volgens S&P behoort ekonomiese groei in 2019 matig te styg, wat die styging in die regering se skuldlas kan beperk.“Ons kan die gradering verhoog indien ekonomiese groei of fiskale uitkomste op ’n noemenswaardige en volgehou manier styg vergeleke met ons huidige projeksies,” sê die gradeerder in sy ontleding.LOPENDE REKENINGDie gradeerder sê as Suid-Afrika sy tekort op sy lopende rekening verminder, sal ’n opgradering ook moontlik word.Die lopende rekening is breedste maatstaf van die verskil tussen die kapitaal, goedere en dienste wat die land in- en uitvloei en ’n groot tekort plaas die rand onder druk.In die tweede kwartaal van die jaar was die tekort R163,8 miljard, oftewel 3,3% van die bruto binnelandse produk, volgens die Reserwebank. Die syfers vir die derde kwartaal word op 6 Desember uitgereik.Aan die ander kant wys S&P steeds op talle risiko’s wat tot ’n verdere afgradering kan lei, soos as die regering sy besteding verhoog, as die ekonomie se swakheid voortduur of as die tekort op die lopende rekening verswak.“Ons kan ook die graderings verlaag indien die oppergesag van die reg, eiendomsregte, of die opdwinging van kontrakte beduidend sou verswak, wat die beleggings- en ekonomiese vooruitsig sal ondermyn.”Laasgenoemde is ’n verwysing na grondonteiening sonder vergoeding, waaroor S&P nie te bekommerd is nie omdat hy glo Suid-Afrika se onafhanklike regbank en wigte en teenwigte in die institusionele raamwerk sal verseker dat die proses ordelik verloop.TESOURIE SE REAKSIEDie tesourie het Vrydagnag in sy reaksie gesê hy “bly vasbeslote om in die tyd wat voorlê verbeterde graderings te behaal”. Die tesourie is egter realisties oor die talle risiko’s wat S&P uitlig en beskou die volgende paar maande as “kritiek”.Jabu Mabuza, medesameroeper van die CEO Initiative, sê in sy reaksie “baie werk moet nog gedoen word voordat ons ons beleggingsgraadstatus kan herwin”.Die organisasie, wat van die land se voorste sakelui betrek by inisiatiewe vir werkskepping en finansiering van klein ondernemings, verwelkom nietemin die feit dat Suid-Afrika nie verder afgegradeer is nie. Die CEO Initiative is ook deel van die Youth Employment Service (Yes), wat op die oomblik deur Solidariteit gekritiseer word omdat dit wit jong mense uitsluit.“Die CEO Initiative werk nou al meer as twee jaar saam met die regering en arbeidsektor in ’n poging om Suid-Afrika se kredietgradering te verbeter, nie soseer as ’n doelwit nie, maar as die uitkoms van strukturele hervorming wat die land op vinniger, volhoubaarder en meer inklusiewe groei sal herstel.”Mabuza sê S&P se besluit “weerspieël Suid-Afrika se vermoë om vordering te maak, selfs al is dit plek-plek klein”. “Ons moedig die regering aan om aan te hou saamwerk met sy vennote in die arbeid- en sakesektor om die moeilike besluite te neem wat vir volhoubare verandering nodig is.”Die tesourie het ook in sy verklaring beklemtoon dat hy al hoe beter met die sake- en arbeidsektor wil saamwerk. – Netwerk24

‘SA kan binne 2 jaar uit rommelstatus kom’

Kommentaar

Republikein 2025-11-05

Meld asseblief aan om kommentaar te lewer

‘SA kan binne 2 jaar uit rommelstatus kom’

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.