SA grense het gister heropen

Francoise Steynberg – Suid-Afrika het gister 20 van sy landsgrense heropen wat sedert 11 Januarie gesluit was. Reisigers kan weer tussen dié buurlande via Namibië se suidelike grensposte van Nakop en Vioolsdrift ry.Met grense tussen Namibië en Botswana wat reeds verlede jaar heropen het, kan padreisigers ook weer via Botswana tussen Namibië en Suid-Afrika beweeg met Suid-Afrika se grensposte Skilpadshek en Ramathlabama wat heropen is.Internasionale reisigers wat na Suid-Afrika vlieg, sal slegs by die internasionale lughawens van O.R. Tambo in Johannesburg, King Shaka Zulu in Durban en Kaapstad deurgelaat word.Reisigers na Suid-Afrika moet 'n geldige sertifikaat hê wat aantoon dat hulle nie Covid-19 het nie. Die sertifikaat moet deur die Wêreldgesondheidsorganisasie (WHO) erken word en mag nie langer as 72 uur voor die reisdatum uitgereik wees nie.'n Reisiger wat by aankoms nie so 'n sertifikaat kan toon nie, sal op eie koste 'n blitstoets vir teenliggaampies moet ondergaan.In die geval van 'n positiewe Covid-19-toets sal die reisiger vir tien dae op eie koste in isolasie moet gaan.Volgens die uitvoerende hoof van die Gasvryheidsvereniging van Namibië (HAN), me Gitta Paetzold, is die heropening van Suid-Afrika se grense verblydend met toerismevloei wat weer sal toeneem.“Vanaf vandeesweek sal die vloei van toerismegetalle dan hopelik oor die grense toeneem – net soos die riviere tans onder die brûe vloei,” sê Paetzold. “Almal is gretig om die natuurwonders te sien – van die Augrabies-waterval in die Noord-Kaap, die Oranjerivier in die Suide tot die Ugabrivier in die Noorde.” NUWE AIRLINK-ROETEIntussen het die private streeklugredery Airlink gister sy nuwe Weskusroete tussen Kaapstad en Walvisbaai aangekondig. Volgens die uitvoerende hoof van Airlink, mnr. Rodger Foster, sal vlugte tussen Kaapstad en Walvisbaai op 2 Maart begin. Airlink sal op Dinsdae, Donderdae en Saterdae tussen Kaapstad en Walvisbaai die volgende vlugte aanbied:• Vlug 4Z 382 vertrek om 14:00 uit Kaapstad en land om 16:15 op Walvisbaai;• Vlug 4Z 383 vertrek om 16:50 uit Walvisbaai en land om 19:00 in Kaapstad.DUITSLANDIntussen het Duitsland Sondag aangekondig dat Namibië se klassifikasie as hoërisikoland gekanselleer en verander is na 'n land met 'n hoë voorkoms van Covid-19-gevalle. Namibië is volgens die Duitse ambassade in Windhoek die enigste land in die Suider-Afrikaanse Ontwikkelingsgemeenskap (SADC) wat nie as 'n hoërisikoland geklassifiseer is nie.Dit beteken reisigers uit Namibië hoef geen Covid-19-toetse met aankoms in Duitsland te toon nie. Die enigste buurland van Namibië wie se grense nog gesluit is, is Angola. Verlede Vrydag het die minister van binnelandse sake, immigrasie, veiligheid en sekuriteit, mnr. Frans Kapofi, die grenspos van Impalila-eiland met Botswana oop verklaar.– francoise@republikein.com.na

SA grense het gister heropen

Kommentaar

Republikein 2025-06-16

Meld asseblief aan om kommentaar te lewer

SA grense het gister heropen

Kommentaar

Republikein 2025-06-16

Meld asseblief aan om kommentaar te lewer

MELD AAN

Advertensie