Só werk kwarantyn nou

Henriette Lamprecht – Buitelanders wat Namibië wil binnekom moet ‘n negatiewe SARS-COV-2 PCR (polymerise chain reaction)-toets van ‘n gesertifiseerde laboratorium, wat nie ouer as 72 uur is nie, saam met hul aansoek vir die verpligte 14 dae kwarantyn voorlê. Die koste van die kwarantyn is vir beide buitelanders en Namibiërs wat terugkeer vir hul eie onkoste. Die betrokke persone moet ook skriftelik die Namibiese diplomatieke verteenwoordiger in die land wat hulle verlaat, twee weke voor die tyd oor die dag en datum van hul beplande aankoms in Namibië, hetsy per pad, lug of see in kennis stel. Ook moet hulle aandui van watter kwarantyngeriewe hulle gebruik gaan maak en wie verantwoordelik is om die rekening te vereffen.Volgens die nuwe kwarantynregulasies is enige persoon wat Namibië binnekom onderworpe aan kwarantyn waar hulle ook vir Covid-19 getoets sal word. Dié wat kwytgeskeld is van die koste verbonde aan kwarantyn, sluit in leerlinge en studente wat in Namibië of die buiteland ingeskryf is, staatspasiënte, gesondheidslui, asook mense wat die land op humanitêre gronde of vir ’n amptelike regeringsbesoek binnekom.Namibiese burgers wat nie die kwarantynkoste kan bekosting nie, kan by die staat aansoek doen dat laasgenoemde die koste dra.Namibiese burgers wat die land vir private sakegeleenthede verlaat, moet ook met hul terugkeer 14 dae in kwarantyn deurbring.Volgens die regulasies kan enige persoon wat “onredelik weier” om in kwarantyn te gaan of getoets te word, ‘n boete van N$2 000 of tronkstraf van ses maande opgelê word.Volgens me. Naemi Shoopala, direkteur van primêre gesondheid in die ministerie van gesondheid en maatskaplike dienste (MoHSS), moet Namibiërs die ministerie vooraf van hul koms inlig om te verhoed dat hulle onaangekondig opdaag.“Dit is om ‘n toestroming te voorkom soos wat ons ervaar het. Mense het net opgedaag en geriewe is onkant gevang en nie altyd voorbereid nie,” het Shoopala tydens ‘n bespreking oor kwarantynregulasies by die Covid-19-kommunikasiesentrum gesê.‘n Lys van geriewe wat deur die ministerie goedgekeur is, is volgens Shoopala op MoHSS se webtuiste beskikbaar. Navrae kan aan MoHSS gedoen word oor watter geriewe plek beskikbaar het.Volgens Shoopala sal die betrokke grens, hetsy see, land of lug oor die beplande aankoms in kennis gestel word. Die persoon wat die land binnekom, sal vervolgens deur ‘n gesondheidsbeampte en ‘n wetstoepasser na die betrokke kwarantyngeriewe vergesel word.Persone wat die land binnekom, is verantwoordelik om vir hulself te betaal, insluitend akkommodasie en etes. Die toetse vir Covid-19 word egter deur die staat betaal.Volgens me. Patemoshela Hamunyela, waarnemende direkteur van gesondheid van die Khomasstreek, is die goedgekeurde kwarantyngeriewe so gekies dat dit naby ‘n grens of lughawe is. Dit is om die moontlike oordrag van die siekte so ver as moontlik te beperk.Hamunyela sê ‘n lys van beskikbare geriewe en die koste van verblyf per dag word deur ‘n beampte van die ministerie gekoördineer.“Met aansoek van kwarantyn sal die lys van geriewe en die pryse van verblyf aan die aansoeker verskaf word, wat dan kan kies waar hy of sy wil bly,” het sy verduidelik.Mense in kwarantyn word volgens haar twee keer getoets. Eers as die uitslae van ‘n negatiewe toets ontvang is, kan die persoon die geriewe verlaat.Me. Phillomena Ochurus, direkteur vir gesondheidsinligting en navorsing by MoHSS, het op haar beurt beklemtoon vanaf die oomblik wat ‘n sertifikaat uitgereik is dat ’n persoon negatief getoets het, moet voorkomende maatreëls steeds toegepas word.“Dit beteken nie as jy negatief getoets het, kan jy nie weer aan die virus blootgestel word nie,” het sy gesê.Met betrekking tot die kwytskelding van koste vir kwarantyn, het Ochurus gesê, mense kan by die ministerie hiervoor aansoek doen. Die aansoekvorm is ook op MoHSS se webtuiste beskikbaar. Die aansoek moet vergesel word van die redes waarom die persoon nie die kwarantynkoste uit sy eie sak kan betaal nie. Dit sal vervolgens aan ‘n paneel voorgelê word wat elke aansoek op meriete sal beoordeel.“As hulle dit regtig nie kan bekostig nie, sal die regering betaal,” het sy gesê. – henriette@republikein.com.na

Só werk kwarantyn nou

Kommentaar

Republikein 2026-07-23

Meld asseblief aan om kommentaar te lewer

Só werk kwarantyn nou

Kommentaar

Republikein 2026-07-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.