Só lyk kans van laer (of hoër) rentekoers nou in SA

Hanlie StadlerAs die Suid-Afrikaanse Reserwebank slegs die swakker rand en die hoër wêreldolieprys oorweeg het, sou die rentekoers Donderdag moes styg.As die sentrale bank slegs trae ekonomiese groei, die swak plaaslike vraag en Suid-Afrika se goeie inflasiesyfers oorweeg het, sou die rentekoers moes daal.Die faktore ten gunste van hoër of laer rentekoerse weeg egter op die oomblik baie ligter as die faktore wat eerder daarop dui dat die rentekoers onveranderd gelaat moet word.Nedbank se tweemaandelikse Rentekoers-barometer bereken dat die kans 63% is dat die rentekoers Donderdag onveranderd gelaat gaan word.Die kans dat die rentekoers verhoog gaan word, is 17% en die kans dat dit verlaag gaan word 20%.Die barometer weeg 13 plaaslike en wêreldwye ekonomiese faktore individueel op. Twee faktore dui op ’n styging, drie op ’n daling en agt dui op ’n onveranderde rentekoers. Die persentasies is ’n geweegde syfer wat meer waarde heg aan die plaaslike ekonomie en inflasie-aandrywers.Reezwana Sumad, ekonomiese ontleder vir Nedbank se korporatiewe en beleggingsbank, sê hulle verwag dus dat die Reserwebank eerder veilig sal speel en die repokoers op 6,75% sal laat. Die prima rentekoers van banke sal dus op 10,25% bly.Dis in pas met ’n Netwerk24-peiling waarin ál 17 ekonome wat deelgeneem het, gesê het hulle reken die rentekoers sal onveranderd gelaat word.“Ons verwag dat die Reserwebank sy inflasieprofiel vir 2018 effens hoër sal hersien, terwyl sy groeiverwagtinge waarskynlik onveranderd sal bly. Ons glo die Reserwebank sal herhaal hoe kwesbaar die rand-wisselkoers is weens geleentheidsrisiko op die horison,” sê Sumad in die verslag.“Daarby sal die moontlike risiko’s van petrolpryse, kragtariewe en die staat se loononderhandelinge waarskynlik uitgelig word.”Daar is ’n magdom risiko’s wat die rand kan laat verswak wat voor die einde van die jaar voorlê. Dit sluit in:•24 November: Minstens twee van die drie groot kredietgradeerders, Moody’s Investors Service en Standard & Poor’s Global Ratings, kondig aan of hulle rand-staatseffekte tot rommelstatus afgradeer. Selfs al word ’n afgradering verwag, kan dit die mark skok en kan dit die rand met selfs R1 teenoor die dollar laat verswak, het John Cairns, RMB se valutahoof, Maandag gesê.•1 Desember: Die brandstofpryse vir Desember word aangekondig en in dié stadium kan diesel met tot 64c per liter styg en petrol met tot 74c per liter – die grootste stygings nóg vanjaar.•3 Desember: Die Federale Reserweraad (Fed) kondig vir die laaste keer vanjaar aan of hy Amerikaanse rentekoerse verhoog. Die mark verwag wel ’n verhoging, wat ook die rand sal laat verswak.•7 Desember: Die Nasionale Energiereguleerder (Nersa) kondig aan watter tariefverhoging hy vir 2018 aan Eskom toestaan. Eskom het 19,9% gevra.•16-20 Desember: Die ANC hou sy nasionale konferensie in Johannesburg. As adj.pres. Cyril Ramaphosa tot ANC-leier verkies word, kan dit die rand laat versterk, maar indien pres. Jacob Zuma se eksvrou, Nkosazana Dlamini-Zuma, of ’n ander kandidaat wen, sal die rand waarskynlik verder gly.Dié faktore is alles dinge wat inflasie weer tot bo die Reserwebank se teiken vir inflasie van 3% tot 6% kan laat styg.Wat ekonomiese groei betref, verwag Nedbank nou 0,8% vir 2017 – effens hoër as die 0,7% vantevore danksy stewige syfers in die tweede kwartaal. Hy verwag dat die herstel tot in die vierde kwartaal sal voortduur.“Dis egter ver onder die potensiaal van 1,5% en voorspel ’n gedempte herstel in 2018.”Die bank se verwagting vir 2017-groei is 0,6% en vir 2018 en 2019 1,2% en 1,3%.Wat inflasie betref, voorspel Sumad dat dit vir 2017 laer gaan wees as die Reserwebank se September-verwagting van 5,3% vir 2017 en 5% vir 2018. Nedbank verwag 5,2% vir 2017 en 4,8% vir 2018, maar Sumad sê daar is heelwat risiko’s wat inflasie hoër as dít kan druk.Die rand het met byna 6% teenoor die dollar verswak sedert die Reserwebank in September die rentekoers onveranderd gelaat het. Op ’n handelsgeweegde grondslag is die rand 4,3% swakker.“Gegewe die sterk moontlikheid van verdere kredietafgraderings en verhoogde politieke risiko, kan die rand wisselvallig bly en is dit moontlik op die punt om verder te verswak.” – Netwerk24

Só lyk kans van laer (of hoër) rentekoers nou in SA

Kommentaar

Republikein 2025-10-30

Meld asseblief aan om kommentaar te lewer

Só lyk kans van laer (of hoër) rentekoers nou in SA

Kommentaar

Republikein 2025-10-30

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.