Só het Thompson sy loopbaan ontspoor

Andrew Poolman - Borgtog is gisteroggend geweier tydens die eerste hofverskyning van Roger Hesron Robert Thompson, voormalige afrigter van die Namibiese o.20-rugbyspan en tot onlangs die bestuurder van die hoëprestasie-program van die nasionale rugby-akademie.Thompson (35), wat Sondag in Katutura in hegtenis geneem is, is aangekla van huisbraak met die voorneme om te steel, asook op twee afsonderlike klagte van die gebruik van 'n voertuig sonder die eienaar se toestemming.Thompson sal op 10 Mei weer in die hof verskyn. Die hof het gelas hy kan 'n formele aansoek om borgtog indien. Die staat het borgtog teengestaan deur aan te voer dat dit nie in die openbare belang is nie en dat hy kan inmeng met die ondersoek wat nog in 'n vroeë stadium is.Op 'n vraag van landdros Selma Amadila het hy aangedui dat hy vir sy eie regsverteenwoordiging sal betaal.Geklee in 'n pers T-hemp, vaalwit kniebroek en plakkies, het Thompson bedees en diep in sy eie gedagtes versonke voorgekom terwyl enkele nuusmedia foto's van hom in die hofsaal geneem het. Sy ouers, asook sy twee broers, almal bekendes in rugbykringe, was nie by die hof teenwoordig nie en sy vrou, Lucille, was die enigste wat die verrigtinge bygewoon het. Die twee het in die hofsaal min oogkontak gemaak, maar het agterna buite die hofsaal kortstondig 'n paar woorde gewissel. BELOWENDE LOOPBAANThompson was 20 jaar oud toe hy in 2004 die eerste keer in 'n wegtoets teen Zambië as plaasvervanger-senter sy debuut gemaak het. 'n Kwalifiserende Wêreldbeker-wedstryd in Marokko twee jaar later was egter die laaste van sy tien toetse, voordat Thompson gedurende Desember 2006 'n positiewe toets vir steroïede gelewer het. Die Internasionale Rugbyraad (nou Wêreldrugby) het hom gevolglik 'n skorsing vir twee jaar opgelê.Thompson het egter 'n suksesvolle tweede kans in afrigting aangegryp. Ná een seisoen waarin hy sy ou klub Western Suburbs na die NRU premierliga-titel gelei het, is hy by die nasionale o.20-span betrek – as hulpafrigter in 2014 en oor die volgende drie jare as hoofafrigter.In 2016 en 2017 het die Namibiese juniors onder Thompson die vierde posisie by die Wêreldrugby Onder 20 Trofee-toernooi behaal – die land se beste posisie nóg en effektief 16de in die wêreld. In die proses het hy etlike spelers onder hande geneem wat intussen tot staatmakers in senior toetsrugby ontwikkel het.Thompson het ook die senior nasionale span op provinsiale vlak, asook die 2015 Wêreldbekerspan in Engeland as verdedigingsafrigter hanteer. Sy aanvoeling vir afrigting was ooglopend en daar is verder in sy loopbaan belê toe hy onder meer afrigterskursusse van Wêreldrugby in Frankryk gaan bywoon het. Indien hy dus in sy baan gebly het, sou hy die logiese keuse gewees het om as hoofafrigter van die Welwitschias ná Lyn Jones en JP Nel se vertrek oor te neem. SKADUKANTIn 2017 het Thompson in sy eie woorde oop kaarte oor die donker kant van sy verlede gespeel toe hy genader is om vir Namibia Media Holdings se eerste Hashtag Festival sy insig op sportafrigting as 'n loopbaankeuse te gee.“Rugby het vanaf skoolvlak vir my goeie geleenthede geskep waarvoor ek baie dankbaar is. My lewe van bendebedrywighede, alkohol en dwelms het dit egter kortgeknip,” het Thompson geskryf.“Om op 'n vroeë ouderdom in die kollig te wees, het sy tol geëis en ek was baie onvolwasse om enige sukses te hanteer. Ek het besluite geneem waaroor ek vandag spyt is, maar ek kan sien hoe dit my as persoon gevorm het.“Ek het met verkeerde mense deurmekaar geraak en my skorsing vir die gebruik van verbode middels het talle deure vir my laat toeklap. My lewe het agteruit gegaan en vriende wou nie meer met my vereenselwig wees nie. Op my eie het ek 'n lewe op straat bewandel, ewig op soek na die volgende dwelm-'high'.“Nadat ek my verhouding met die Allerhoogste herstel het, het my lewe terug op koers gekom. Die reis op die dwaalweë het my gevorm om 'n vreugdevolle lewe te lei waarmee ek nou tevrede is.“Vandag praat ek gereeld met die jeug en deel my ervaringe, goed en sleg. Ek sien myself nie as 'n motiveringspreker nie, maar as iemand met 'n getuienis wat die rigting van 'n lewe kan help verander. “Vandag leef ek my droom as nasionale o.20-afrigter en hoof van die nasionale rugby-akademie – 'n program gebaseer op 'n holistiese benadering van ontwikkeling om beter rugbyspelers, maar ook beter mense te help skep.” TERUGSLAGVolgens bronne naby aan Thompson was hy vir bykans agt jaar “skoon”, voordat 'n klaarblyklike terugkeer na dwelmgebruik sy professionele en persoonlike lewe opnuut ontspoor het.Gedurende die eerste helfte van verlede jaar het Thompson onder 'n wolk soek geraak toe die Namibiese o.20-span vir sy internasionale verpligtinge moes voorberei en is Henry Kemp op kort kennisgewing as sy plaasvervanger aangestel. Dit het later aan die lig gekom dat hy vir behandeling by 'n dwelmrehabilitasiesentrum in die Wes-Kaap opgeneem was.Gedurende die eerste naweek van Februarie vanjaar het die verdwyning van vier skootrekenaars uit die kantoor van sy werkgewer, die Namibiese Rugbymaatskappy (NRL), aanleiding gegee tot strafregtelike klagte van diefstal teen Thompson, nadat die kantoorkompleks se veiligheidskameras hom as 'n verdagte uitgewys het.Een van die verdwene skootrekenaars was toegeken aan Sam Pickford, die Wallieser wat die nasionale afrigterspan se video-ontledings behartig.Die NRL en ene Astrid Feris het ook afsonderlike klagte by die polisie aanhangig gemaak dat Thompson voertuie sonder hul toestemming gebruik het.

Só het Thompson sy loopbaan ontspoor

Kommentaar

Republikein 2026-08-04

Meld asseblief aan om kommentaar te lewer

Só het Thompson sy loopbaan ontspoor

Kommentaar

Republikein 2026-08-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.