Rykes het glo ook slapelose nagte

Ek wonder of ryk mense ook bekommernisse het. Hulle het glo ook slapelose nagte. Om baie geld te hê, is glo nie so maklik nie, want jy moet jou miljarde mooi bestuur. Een Italiaanse miljardêr, Pier Luigi Loro Piana, het glo ook probleme. Sy luukse seiljag dobber as ’n wrak in die see rond nadat dit van ’n vragskip in die Middellandse See afgegly het, berig Netwerk24.My Song, ’n 40 m lange seiljag spesiaal aangepas vir sy eienaar, is tussen die Spaanse eiland Majorka en die Italiaanse stad Genua vervoer toe sy tydens ’n storm van die skip afgeval het, berig WTVR.com. Sies tog, My Song het toe haar swanesang gesing. My Song sou in Junie aan die jaarlikse Loro Piana-regatta vir superjagte deelgeneem het wat in Porto Cervo, Sardinië, gehou word. Die jag was ontwerp vir spoed en was terselfdertyd gemaklik om in rond te vaar. Loro Piana is die erfgenaam van die kleremaatskappy met dieselfde naam en is volgens die tydskrif Forbes US$1,6 miljard werd. Hy sal sy gordel stywer moet intrek om die toptienlys van rykstes te haal. Die jag het al verskeie pryse en titels gewen, wat die beste jag op die Wêreldtoekennings vir Superjagte insluit. Een prys minder vir My Song.Daily Mail berig ’n seiljagkenner het gesê dit is ’n vreeslike hartseer einde vir ’n beroemde superjag wat ’n ster onder superjagte was. Ek wonder of die seiljagkenner al gehoor het van die hartseer einde van baie Nambiese vroue aan die bloedhande van hul lewensmaats. Die seiljag was toegerus met die beste en nuutste tegnologie. Baie Namibiërs in landelike gebiede het nie eens selfoonsein nie en baie kan net Tamagotchis bekostig. Ek wonder wie rol snags die meeste oor hul probleme rond – rykes of armes? Rykes is bekommerd oor waar om hul miljarde te belê, oor hul aandeelpryse wat oornag kan val (soos die Steinhoff-skok) en in watter modehuis se skepping hulle moet pronk. Vir Namibiërs is mode heel onder op hul prioriteitslys en die meeste dra tweedehandse klere wat hulle by iemand anders geërf het. Baie Namibiërs bekommer hulle oor waar vandag en môre se kos op die tafel vandaan gaan kom. Ons Namibiërs het baie bekommernisse: armoede, werkloosheid, die gewraakte twee persent, die versengende droogte, die leë damme en waterskaarste, voedselonsekerheid, klimaatsverandering wat ons die ergste raak, die brandstofverhoging, vervalle hospitale en staatsinfrastruktuur, die verkiesing en korrupte politici. Lyk my korruptes slaap snags doeksag, want hulle het in elk geval geen skuldige gewetens nie. Volgens Forbes is die top-10-rykstes (let wel net mans) in die wêreld Jeff Bezos, die stigter van Amazon, met US$131 miljard, gevolg deur Bill Gates, Warren Buffett, Bernard Arnault, Carlos Slim Helu, Amancio Ortega, Larry Ellison, Mark Zuckerberg, Michael Bloomberg en Larry Page met “net” US$50,8 miljard. Namibië se totale begroting is N$66,6 miljard. Die rykste van die rykes, Bezos, het sy vrou, MacKenzie, vir sy skelmpie gelos en nou kry sy ’n deel van sy fortuin (US$36,6 miljard) uit die egskeiding, waarvan sy die helfte glo vir liefdadigheid gaan skenk. Baie Namibiese mans betaal nie eens papgeld vir hul kinders nie.Miskien moet dié toptien- ryk omies net 2% van hul rykdom aan Namibië skenk, dan sal ons skuldlas en slapelose nagte minder wees.

Rykes het glo ook slapelose nagte

Kommentaar

Republikein 2026-11-03

Meld asseblief aan om kommentaar te lewer

Rykes het glo ook slapelose nagte

Kommentaar

Republikein 2026-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.