Rust-uitspraak volgende jaar

Jacqueline Louw – Landdros Alexis Diergaardt het verlede Dinsdag haar uitspraak in die verhoor van die Okahandja-boer, mnr. Kai Rust (45), wat teregstaan op ’n moordklag en drie klagte van poging tot moord, na 23 Januarie uitgestel ná aanhoor van betoë deur die staatsaanklaer mnr. Filemon Nyau en die prokureur mnr. Jan Wessels.

Nyau het die hof in sy geskrewe sluitingsargument versoek om Rust skuldig te bevind op al die klagte teen hom. Wessels, wat Rust verteenwoordig, het vir kwytskelding op al die klagte teen sy kliënt gevra. Hy het die hof verder versoek om Rust nie aan strafbare manslag skuldig te bevind nie.

Die 45-jarige Rust het aan die begin van sy verhoor onskuldig op al die klagte teen hom gepleit.

Die klagte teen Rust spruit uit ’n skietvoorval op 27 Januarie 2016 op die plaas Otukaru waartydens ’n stroper, die 41-jarige Andreas Ukandanga, dood is.

Getuienis is gedurende die verhoor gelei dat die oorledene deur ’n opslagkoeël getref is terwyl hy gebukkend agter ’n groot rots gesit het en ’n gestroopte koedoe afgeslag het.

Die staat het aangevoer Rust het vir Ukandanga geskiet en dat hy daarna ook geskiet het op die drie mans wat saam met hom was.

Rust was ná sy inhegtenisname in Januarie verlede jaar vir ’n jaar en vyf maande in aanhouding voordat borgtog in Julie vanjaar aan hom toegestaan is.