Rust teleurgesteld oor uitspraak

Denver Kisting - Die 45-jarige Okahandja-boer, mnr. Kai Rust, wat Vrydag in die streekshof in Windhoek aan strafbare manslag skuldig bevind is weens die 2016-skietdood van ‘n stroper, is teleurgesteld oor dié uitspraak.

Hoewel Rust op aanklag van moord tereggestaan het, het streekslanddros Alexis Diergaardt bevind daar was geen direkte bedoeling om mnr. Andreas Ukandanga (41) om die lewe te bring nie.

Gevolglik het sy hom aan die mindere misdaad van strafbare manslag skuldig bevind. Dié skuldigbevinding spruit daaruit dat hy luidens die landdros grof nalatig was.

Diergaardt het bevind die hof kon nie steun op Ukandanga se stroperkollegas se getuienis tydens Rust se verhoor nie.

Derhalwe moes sy staatmaak op omstandigheidsgetuienis en die beskuldigde se weergawe.

Rust is vrygespreek op die ander drie klagte van poging tot moord waarvoor hy ook in die beskuldigdebank was.

Die oorledene en drie makkers was op die dag van die tragedie, 27 Januarie 2016, in die geselskap van drie honde en bewapen met ‘n panga en ‘n spies en op ‘n selferkende stroopsending op Rust se familieplaas in die omgewing van die tuindorp.

Tydens die verhoor het die hof gehoor Rust en twee van sy werknemers, van wie een ook namens die verdediging getuig het, was op die spoor van blaffende honde – volgens getuienis ‘n teken dat stropers in die omgewing doenig kan wees.

Toe hulle uiteindelik twee honde aantref, het Rust ‘n skoot afgevuur. Volgens hom wou hy nie dadelik die dier van kant maak nie en het hy eers met die tweede skoot die hond getref.

Hy het daarna nog twee waarskuwingskote geskiet waartydens hulle die drie ander mans van die toneel sien vlug het.

Ná al dié skote het Rust en sy werknemers by nadere ondersoek die lyk van die oorledene en ‘n koedoekarkas gekry.

Hoewel hy volgehou het hy het niemand gesien toe hy die eerste twee skote afgevuur het nie, het streekslanddros Diergaart bevind ‘n redelike persoon in sy skoene sou kon voorsien dat daar mense in die omgewing van die honde kon wees, veral omdat stropers dikwels van honde gebruik maak.

Daarnaas het Diergaardt bevind nóg die honde nóg die stropers het in daardie stadium ‘n gevaar vir Rust ingehou.

Die hof het tydens die verhoor ‘n ter plaatse ondersoek aan die toneel gebring.

Rust het onmiddellik ná streekslanddros Diergaardt uitspraak gelewer het, ter strafversagting getuig.

Volgens hom is hy ondanks sy teleurstelling in die uitspraak “jammer dat iemand in daardie voorval beseer is”.

Om die hof ‘n indruk te gee van sy persoonlike omstandighede, het hy voorts getuig hy en sy vrou sien om na een van sy twee stiefseuns, dat hy gesondheidsuitdagings beleef – onder meer hart- en bloeddrukprobleme – en die grootste verantwoordelikeid op die plaas dra wat die bykans 600 grootvee van hom, sy pa en suster betref.

Hy het ook gesê indien die hof hom begenadig en ‘n boete oplê, hy dit met die hulp van familie en vriende sou kon betaal.

Rust moet op Vrydag 16 Februarie, na die hof terugkeer vir betoë voor vonnisoplegging.

Diergaardt het sy borgtog van N$40 000 tot dan verleng.

Sy verdediging is deur mnr. Jan Wessels behartig, terwyl mnr. Filemon Nyau namens die staat aangekla het.