Russiese miljardêr koop'n trop olifante by Erindi

Ellanie Smit – 'n Trop van 13 olifante is verkoop, gevang en van die Erindi Private Wildreservaat verskuif na die Marula Game Ranch naby Dordabis, wat deur mnr. Rashid Sardarov, 'n Russiese miljardêr, besit word.Dié reuse-operasie het verlede week plaasgevind nadat Marula Game Ranch aanvanklik tydens 'n veiling op dié private wildplaas in 2016 sewe olifante van Erindi gekoop het.Die hoofbestuurder van Marula Game Ranch, mnr. Johan Kotze, het aan Republikein se susterkoerant Namibian Sun gesê daar was verskeie vertragings wat daartoe gelei het dat die olifante nie na Marula vervoer kon word nie. Die operasie kon egter verlede week Donderdag uiteindelik realiseer.Volgens Kotze het die olifante weens die vertragings verder geteel en omdat dit 'n familietrop was, wou hulle nie die olifante van mekaar skei nie. Op die ou einde het hulle 'n groep van 13 olifante gehad wat gevang en verskuif is, in plaas van die eerste sewe wat hulle gekoop het.Kotze het gesê die operasie is onder meer vertraag deur die langdurige droogte en omdat hulle heining in daardie stadium nog nie olifantbestand was nie.Hy sê hoewel hulle Donderdagoggend begin het en die olifante dié aand by Marula gevestig was, was dit 'n uiters moeisame taak.REUSETAAKHy het gesê ongeveer 60 mense was betrokke, onder wie personeel van die ministerie van die omgewing, bosbou en toerisme en amptenare van die eenheid vir beskermde hulpbronne wat toesig oor die operasie gehou het.Verder was spesiale permitte nodig vir die verskuiwing en vervoer van die olifante, terwyl hulle ook vier hyskraanvragmotors, 'n helikopter en twee private veeartse benodig het. “Al die olifante het veilig hier aangekom en nie een is beseer nie.”Hy het gesê dit was nie nodig om hulle by Marula in bomas aan te hou nie, want hulle was rustig en is vrygelaat die oomblik toe dit gelyk het of hulle goed aanpas in hul nuwe omgewing.PRIVAAT EIENDOMIntussen het mnr. Colgar Sikopo, die direkteur van dié ministerie se afdeling vir natuurlike hulpbronne-bestuur, aantygings ontken dat hierdie olifante staatseiendom is, eerder as in die private besit van Erindi.“Hierdie olifante is nie van die Khaudum Nasionale Park, of die ministerie s'n nie,” het hy gesê.Erindi het in Julie 2013 'n tender ontvang om 100 olifante uit die Khaudum Nasionale Park te hervestig, wat op 'n huurooreenkoms van tien jaar aan hulle aangebied is.Sikopo het gesê dié ooreenkoms is steeds in plek en die ministerie het die versekering gegee dit is nie hulle olifante wat verkoop word nie. Volgens hom het Erindi olifante voor die Khaudum-olifante gehad, en deur middel van merke op hul ore kon hulle seker maak watter olifante gevang en na Marula vervoer is.Hy het bygevoeg alle permitte vir die operasie was geldig en die ministerie is tevrede dat die olifante by 'n behoorlike fasiliteit aangehou word. Marula het vir 15 permitte aansoek gedoen en kan dus nog twee olifante hervestig.Marula Game Ranch is op 'n reservaat van byna 50 000 hektaar geleë.Kotze het vroeër aan Namibian Sun gesê die plaas spog met 7 500 spesies, waar onder wildsbokke, kameelperde, sebras, krokodille, seekoeie, jagluiperds en ander beskermde spesies.Sardarov is die voorsitter en stigter van twee groot private ondernemings in Rusland, Comsar Energy Group en South-Ural Industrial Company (SUIC), met belange in verskeie lande in Oos-Europa. Volgens SUIC se webwerf beloop die gesamentlike bates van dié twee maatskappye US$2,2 miljard.Hy word beskryf as 'n flambojante Russiese oligarg met belangstellings in energiebesighede, eiendom, lugvaart, gasvryheid en jag vir ontspanning.Sy naam is ook in die sogenaamde Panama Papers genoem. - republikein@republikein.com.na

Russiese miljardêr koop'n trop olifante by Erindi

Kommentaar

Republikein 2026-02-03

Meld asseblief aan om kommentaar te lewer

Russiese miljardêr koop'n trop olifante by Erindi

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.