Rundu se wegholskuld vir water

Kenya Kambowe op Rundu – Teen Meimaand het die Rundu-dorpsraad NamWater 'n allemintige bedrag van N$125 miljoen geskuld – N$49 miljoen meer as die bedrag wat 20 maande tevore verskuldig was.In September 2019 het ons susterkoerant Namibian Sun berig dat Rundu die waterverskaffer ongeveer N$76 miljoen skuld. Hierdie syfer het egter die hoogte ingeskiet – 'n situasie wat die plaaslike owerheid aan die impak van die Covid-19-pandemie toeskryf. Dit is bevestig deur die uitvoerende hoof van die Rundu-munisipaliteit, mnr. Olavi Nathanael, in reaksie op Namibian Sun se navrae oor die dorp se groeiende skuld.Hy het gesê die N$125 miljoen wat aan NamWater verskuldig is, is N$7 miljoen minder as wat die raad die vorige maand geskuld het.“Teen 31 Mei het die raad NamWater 'n bedrag van N$124 703 957,53 geskuld. Hierdie syfer is besig om af te neem as ons dit vergelyk met ons state van 30 April, wat N$132 271 604,57 beloop,” het Nathanael gesê.Hy het verduidelik die toename in skuld was as gevolg van die konvensionele waterstelsel waarna die raad moes oorskakel toe die viruspandemie verklaar is – in teenstelling met voorafbetaalde watermeters, wat gelei het tot lae invordering van inkomste.Gevolglik kon die raad van April 2020 tot 31 Januarie 2021 slegs minimumbetalings op sy NamWater-skuld maak, het hy gesê.SKULDINVORDERING WERP VRUGTE AFIntussen word Rundu bykans N$500 miljoen geskuld deur kliënte wat nie hul rekeninge betaal het nie.Namibian Sun het gister berig die raad het deur die skuldinvorderaar Redforce Debt Management sedert Oktober verlede jaar N$29 miljoen van verskillende belanghebbendes verhaal.Deel van dié bedrag sal gebruik word om die NamWater-skuld te vereffen, het Nathanael gesê.Die uitvoerende hoof sê die plaaslike bestuur sal voortaan weer van die voorafbetaalde stelsel gebruik maak, wat beteken die dorp kan slegs water verbruik op grond van die eenhede wat maandeliks gekoop word. Ondanks die feit dat die munisipaliteit die yslike bedrag aan NamWater skuld, sukkel Rundu-inwoners nie meer met watertekorte soos in die verlede nie, toe krane tot vier dae op 'n slag sou droog bly. Rundu se laaste groot waterkrisis was in 2018, toe inwoners onkant betrap is en 'n week sonder water gelaat is nadat NamWater die dorp se watervoorraad afgesny het. Destyds moes die minister van landelike en stedelike ontwikkeling tussenbeide tree deur N$2 miljoen as 'n reddingsboei te gee. Die bevolking van Rundu is ongeveer 100 000 mense, wat groot druk op die plaaslike owerheid plaas om inwoners van water te voorsien.– republikein@republikein.com.naFOTORundu skuld NamWater steeds miljoene. Foto ter illustrasie

Rundu se wegholskuld vir water

Kommentaar

Republikein 2026-05-04

Meld asseblief aan om kommentaar te lewer

Rundu se wegholskuld vir water

Kommentaar

Republikein 2026-05-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.