Ruk jouself reg

Augetto GraigHoe maak mens jouself reg? Sê nou jy besef jy is verkeerd. Hoe kry jy jouself weer reg? Dit mag eenvoudig klink, maar dis nie altyd so maklik nie. Soms is die enigste opsie om jouself reg te ruk. Dit is dan so maklik om net aan te gaan. Dis so maklik om jou skouers op te trek en te sê: “So gemaak, so gelaat staan.”Die stelling is egter nie waar nie; nie as jy dit op mense wil toepas nie.Mense verander. Mense groei. Mense leer en ontwikkel gewoontes, gedagtes, benaderings en hul eie siening van die lewe. Daar is altyd die invloed van omstandighede, opvoeding, opleiding en ervaring, maar daar is ook altyd die bydrae van jou eie besluite – jou eie reaksies, jou eie keuses. Jy het jouself so gemaak. Dit kan ’n moeilike waarheid wees om te aanvaar. Baie mense weier volstrek om hul verantwoordelikheid vir hul eie lewens te besef. Ongelukkig los dit daardie mense heeltemal aan die genade van die lewe oor, en die lewe is soms genadeloos. My ouma het altyd gesê: “Die lewe wil gelewe wees.” Deel daarvan is dat hy jou sal uitdaag, wees maar verseker daarvan.Ek raai jou aan om liewer verantwoordelikheid vir jou eie lewe te neem en die beste daarvan te maak, binne die perke van jou omstandighede. Soos jy meer gewoond raak om verantwoordelikheid te vat, sal jy ook meer selfvertroue kry om doelbewuste veranderings te maak, glo ek. So bemagtig jy jouself en neem beheer van jou eie lewe. Moet nie ’n slagoffer van jou lewe wees nie. Lewe hom. Dis in die proses van om te lewe dat jy jouself reg kan maak. Om jouself van die lewe te onttrek, help net as jy tyd nodig het om jou sienswyse te verander. Jy het egter nie tyd nodig nie. Hoe lank neem dit om van plan te verander? In minder as ’n sekonde kan jy anders besluit. Jy hoef jouself nie eens te oortuig nie. Jy kan net besluit jy sien dit nou so, dan is dit nou so. Reg of verkeerd? Hierdie vermoë is volgens my ’n “super-power” solank jy dit reg toepas. Dit kan natuurlik ook ’n lokval wees. Mens sien dit baie met bedrieërs en skurke wat mense teen hul beterwete oortuig. Jy en ek is albei kwesbaar in dit wat ons wil glo. Baie keer is ons begeerte ons swakpunt, maar as boewe daarvan kan gebruik maak, hoekom nie ook onsself nie? Dus kom dit als weer op onsself neer. Maak jouself reg.Besluit eers. Dan lewe jy dit uit.Soos die sekondes minute raak, die dae weke en die weke maande, so sal jy dag in en dag uit bietjies vir bietjies herstel. Jy sal so stadigaan verbeter. Jy sal regkom. Jy het mos so besluit. Nou toe.

Ruk jouself reg

Kommentaar

Republikein 2026-02-23

Meld asseblief aan om kommentaar te lewer

Ruk jouself reg

Kommentaar

Republikein 2026-02-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.