Ruimte vir 'n pendeltuig

Mukhtar Mukuddem – Die groot avontuurfietse wat soggens en saans so tussen die stilstaande verkeersbane deur beweeg, proe nie so gereeld grondpad as wat hul eienaars met die koopslag gehoop het nie.Hulle is nogtans uiters doeltreffende pendelvoertuie en regverdig hul groot pryskaartjies só. Maar ’n BMW R1200GS kos al sowat N$200 000 en die ryer wat nie gereeld na Die Hel of deur die Baviaanskloof toer nie, moet hom dus vra of sy grênd pendeltuig nie dalk ’n kernbom by ’n vuurwerkvertoning is nie, en of Honda se “Halwe-Jazz” nie dalk sy volgende fiets moet wees nie. Veral nou dat die nuwe een hier is.Dié “Tweewiel-Jazz” word soms so genoem omdat sy enjinblok die helfte van ’n Jazz-enjin s’n is. Dié halwe kar-enjin gee die motorfiets hope wringkrag teen lae enjintoere (r/min). Teen 4 500 r/min pluk hy sommer boompies uit, maar teen 6 500 r/min raak hy uitasem soos ’n ou wat net jaarliks by sy Vitality-evaluering oefen. Lae toere help egter juis om die NC750X ’n besonder lae verbruiksyfer van 4 liter/100 km (24 km/liter) te gee. Dit verklaar ook verkope van digby 244 000 wêreldwyd in minder as vier jaar.Honda het onlangs die bekendstelling van die nuwe fiets by sy opleidingsentrum, African Dream Adventures, naby die Hartbeespoortdam in Noordwes gehou. ’n Avontuurfiets soos die Honda Africa Twin of BMW GS is die NC750X nie, maar dele van ons toetsroete was grondpad, om te wys die letter X in sy naam is darem nie om dowe neute daar nie. Die fiets het oral lekker stewig op die pad gesit, met genoeg terugvoering deur die Showa-voorvering en ’n sagte rit. Die wiele is 17” groot – voor en agter – en dit dra by tot die stabiele rygevoel.Teen 220 kg is hy nie ’n veergewig nie, maar in die ry voel hy nie lomp of swaar nie, selfs teen slaksnelheid. Die ritposisie is gerieflik en die hoë sitplek ook. Die remme, met enkelskywe voor en agter, is eersteklas – selfs sonder ABS. Vanweë die NC750X se gewildheid wêreldwyd, sal die ABS-weergawes eers later vanjaar hier aankom.Die windskerm is langer as tevore, maar steeds te kort. Dis onverklaarbaar, want die Africa Twin se skerm is lank genoeg en werk doeltreffend. Op die NC750X het die “wind” my in die nek getref en toe ek myself klein maak, tref dit my valhelm. Teen ’n kruisspoed van 120-130 km/h raak dit gou ’n irritasie.Die nuwe instrumentasie met verstelbare kleure het my effens verwar, maar ’n mens raak dit seker gewoond. Dit dui onder meer aan in watter rat die fiets is en hoeveel brandstof verbruik word. Nog ’n glanskenmerk van die NC750X is sy unieke bagasieruim wat lyk of dit die petroltenk is. Met ’n volume van 22 liter is dis nou ’n aks groter as tevore en ogies met rubbergespes maak dit maklik om goed stewig te hou.Langs sy voorganger is die nuweling se stilering opmerklik anders en die mooier nuwe uitlaatstelsel laat die enjin grom asof hy meer byt het as vantevore. Die netjiese allooiwiele is so ontwerp dat ’n mens die klep makliker kan bykom om bande op of af te blaas.Die NC750X se beste kenmerk is moontlik die outomatiese ratkas wat jy vir N$10 000 bo-op die konvensionele fiets se N$100 000 kan aanskaf.Dis glo verbeter en het nou drie sportmodusse, maar was ook nie by die bekendstelling beskikbaar nie. Uit ervaring weet ek egter hoe doeltreffend en lekker hierdie dubbelkoppelaar-stelsel werk. Dis sonder enige twyfel die bykomende geld werd. – Netwerk24

Ruimte vir 'n pendeltuig

Kommentaar

Republikein 2025-07-22

Meld asseblief aan om kommentaar te lewer

Ruimte vir 'n pendeltuig

Kommentaar

Republikein 2025-07-22

Meld asseblief aan om kommentaar te lewer

MELD AAN

Advertensie