Rugbyskole kan krimp weens akademie-reël

Andrew Poolman – Administrateurs van die Namibiese Hoërskolerugbyvereniging (Nassra) was die naweek in Windhoek byeen om beplanning met die oog op aanstaande jaar se hervatting ná die verlore Covid-19-jaar te doen.In die Momentum o.19-ligas moes in die raadsaal ’n besluit geneem word hoedat die nuwe regulasie hanteer moet word dat graad 11-skoliere wat nie in minstens drie vakke ’n 60%-slaagsyfer behaal nie, die skoolbanke moet verlaat.Ondanks teenkanting is die besluit geneem dat hierdie graad 11’s die volgende jaar ook nie toegelaat sal word om skolerugby in die Momentum o.19-ligas te speel nie.Hierdie akademiese regulasie vir graad 11’s geld nie vir privaatskole onder die NAPSO-vaandel wat die IEB-kurrikulum volg nie en die privaatskole (met uitsondering van Windhoek Gimnasium) het wel gestem dat rugbyspelers wat nie akademies die peil haal nie, uitgesluit moet word om in die nasionale liga te speel.Vir regeringskole, hetsy in Windhoek of op die platteland, wat op hul beste reeds ’n opdraande stryd voer om teen privaatskole kompeterend te bly, kan hierdie besluit ’n dodelike knou gee. Die verlies van ’n hand vol spelers kan potensieel daartoe lei dat ’n skool se diepte sodanig geraak word dat hy na ’n laer liga sal moet afgradeer, of moontlik selfs sy onvoltallige spelersgroep uit deelname aan die liga moet onttrek.Mnr. Abie van Wyk, een van Nassra se senior raadslede, het ná die vergadering aan die koerant gesê die vereniging sal vandeesweek ’n dag of twee benodig om die pad vorentoe in ’n amptelike nuusverklaring uit te spel.“Ons wil net eers al die besluite behoorlik formuleer, eerder as dat daar onduidelikheid is wat onnodige kritiek en omstredenheid tot gevolg het. Sommige van die bestaande regulasies is gewysig.”Van Wyk het die besluit bevestig dat graad 11’s wat nie hul skooljaar deurkom nie, nie met skolerugby sal mag voortgaan nie.“Dit is ’n jammerte. Miskien kry ons dit reg om ’n afsonderlike ope liga vir o.19- of o.20-spelers buite skoolverband op die been te bring.”Waarnemers het egter bedenkinge oor die praktiese waarskynlikheid om van laasgenoemde idee ’n sukses te maak. Afgesien dat ’n borg gevind sal moet word om dit finansieel moontlik te maak, is dit onder huidige omstandighede reeds ’n groot uitdaging om die rugbyseisoen in die akademiese skooljaar ingepas en afgehandel te kry.Momentum Namibia, hoofborg van Namibiese hoërskolerugby se ligas vanaf o.14 tot o.19 die afgelope jare, was ook op die vergadering verteenwoordig.Dit is bekend gemaak dat mnr. Shaun Powell, bekend vir sy werk met die Gravity Cup-skolereekse, op aanbeveling van die borg as administrateur van die Momentum-ligas vir die volgende drie seisoene aangestel is.GETALLE DAAL REEDSOndanks Namibië se bewese rekord as ’n teelaarde vir rugbyspelers wat selfs ná skool, voer hy die afgelope jare ’n stryd om die afwaartse kurwe in die getalle van deelnemende spanne en spelers om te keer.In vergelyking met die 2012-rugbyjaar (2 875 spelers in 115 spanne van 52 skole landswyd) het eersgenoemde twee syfers ’n konstante daling getoon tot verlede jaar se 72 spanne van 57 skole, wat op nagenoeg 1 800 spelers in alle ouderdomsgroepe te staan kom.Die gebrek aan en afname in mansonderwysers by skole word as een van die faktore vir hierdie verskynsel uitgesonder.

Rugbyskole kan krimp weens akademie-reël

Kommentaar

Republikein 2025-12-17

Meld asseblief aan om kommentaar te lewer

Rugbyskole kan krimp weens akademie-reël

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.