Rommel is goeie nuus vir slim beleggers

Daar was in die verlede dikwels gevalle dat lande wie se kredietgradering tot rommelstatus afgegradeer is, se aandelebeurse daarna besonder hoë opbrengste behaal het.Die rede hiervoor is dat beleggers wat paniekerig op die afgradering gereageer het, koopgeleenthede gebied het vir kalmer beleggers wat ryklik die vrugte daarvan gepluk het.Dit is om dié rede belangrik dat Suid-Afrikaanse beleggers nie impulsiewe besluite ná die afgraderings neem nie, sê Feroz Basa, medefondsbestuurder van die fonds Old Mutual Global Emerging Markets (GEM) by die Old Mutual Investment Group.Die kredietgraderingsagentskappe S&P Global en Fitch het onlangs ná pres. Jacob Zuma se jongste skommelinge van die kabinet aangekondig dat die gradering van Suid-Afrika se skuld in buitelandse geldeenhede nie meer beleggingstatus geniet nie, en het dit tot sogenaamde rommelstatus afgegradeer.Daar word nog gewag op Moody’s, die derde van die drie groot kredietgraderingsagentskappe, om sy hersiening van Suid-Afrika se kredietgradering af te handel.Volgens Basa beteken dit dat drie van die vyf lande in die Brics-groepering (Brasilië, Rusland, Indië, China en Suid-Afrika) se kredietstatus nou gelyk aan rommel is. Brasilië en Rusland se graderings is ook onlangs afwaarts aangepas. Tog was hul aandelemarkte in 2016 die ontluikende markte wat die beste presteer het.Basa sê beleggers tree dikwels paniekerig op wanneer ’n land se kredietgradering verswak, en dit lei daartoe dat aandeelpryse en die waarde van die geldeenheid dikwels skerp daal. Baie van die verkope wat plaasvind, word egter nie oordeelkundig gedoen nie, wat meebring dat die pryse van selfs uitsoekaandele skerp daal. Dit bied baie aantreklike beleggingsgeleenthede vir slim beleggers.Volgens Basa gaan ’n afgradering gewoonlik gepaard met baie swak ekonomiese groei, maar dit is nie altyd noodwendig ’n aanduiding van wat op die aandelemark gebeur nie.Hy noem weer die voorbeeld van Brasilië, waar grootskaalse korrupsie tot die afdanking van pres. Dilma Rousseff gelei het. Groot hoeveelhede kapitaal het uit Brasilië gevloei nadat S&P en Moody’s die land se kredietgradering in reaksie op die skandaal verlaag het. Dié land se ekonomie het in 2015 negatiewe groei van 3,5% ervaar. Tog het die land se aandelebeurs in 2016 ’n opbrengs van 66% behaal, wat die beste van alle ontluikende markte was.Die afgradering van Suid-Afrika se kredietstatus het nog nie gelei tot die paniekerige reaksie wat afgraderings in ander lande soos Brasilië gekenmerk het nie. Die rand het aanvanklik verswak en daar was matige verkope van aandele en effekte, maar die omvang van die uitvloei was nie naastenby so erg soos wat in Brasilië ervaar is nie.“Die Suid-Afrikaanse markte reageer glad nie soos normaalweg ná ’n afgradering nie. Die rand is trouens weer terug op sy langtermyn-gemiddeld,” sê Basa. Dit kan natuurlik verander as Moody’s ook besluit om Suid-Afrika af te gradeer.Volgens Basa kan die rand se oënskynlike sterkte grootliks toegeskryf word aan swakheid van die dollar. “Die huidige sterkte van die rand het eintlik niks met Suid-Afrika te doen nie, maar hou verband met die verswakking van die dollar teenoor ontluikende geldeenhede.”Die gevolg is dat die Suid-Afrikaanse mark nog nie die koopgeleenthede bied wat gewoonlik op ’n afgradering volg nie, wat dit nodig maak om tans na ander geleenthede te soek om portefeuljes te diversifiseer. - Netwerk24

Rommel is goeie nuus vir slim beleggers

Kommentaar

Republikein 2026-05-05

Meld asseblief aan om kommentaar te lewer

Rommel is goeie nuus vir slim beleggers

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.