Rojas verbeter stokou wêreldrekord in driesprong

Yulimar Rojas van Venezuela het 'n wêreldrekord wat sedert haar geboortejaar in die boek was met haar laaste sprong in die vroue se driesprong-kompetisie by die Olimpiese Spele in Tokio verbeter.

Sy het die goue medalje met 'n sprong van 15,67 meter gewen en te verstane feesgevier soos lanklaas gesien is.

Rojas (25) het vroeg in die eindstryd die Olimpiese rekord verbeter. Sy het 'n kans op die wêreldrekord verspeel deur oor te trap en toe met haar laaste poging dit omtrent verpletter.

Sy het 'n kans op die wêreldrekord verspeel deur oor te trap en toe met haar laaste poging dit omtrent verpletter.

Die Oekraïne se Inessa Kravets het in 1995 15,50 m ver gespring.

Die vorige beste by 'n Spele was die 15,38 m, wat in 2008 in Beijing behaal is. Rojas, 'n tweemalige wêreldkampioen, het 15,41 m met haar eerste poging behaal.

Sy moes in 2016 in Rio de Janeiro met silwer tevrede wees.

Patricia Mamona van Portugal (15,01 m) en Ana Peleteiro van Spanje (14,87 m) was onderskeidelik tweede en derde en het albei met nasionale rekords op die podium geklim.

– Netwerk24

FOTO
Yulimar Rojas van Venezuela poseer vir ’n foto nadat sy driesprong-goud met ’n wêreldrekord verower het. Foto Getty Images