Roemryke sege beklink ICC-prys

Andrew Poolman – Krieket Namibië het gister met trots die nasionale manspan se ontvangs van 'n gesogte toekenning van die Internasionale Krieketraad (ICC) aangekondig. Die Eagles is vereer vir die beste prestasie deur 'n lidland met assosiaatstatus, nadat hul oorwinning teen Hongkong in April 2019 as wenner van hierdie kategorie aangewys is.Dié wedstryd by Affiespark was die bepalende uitslag wat vir Namibië vir die eerste keer in 16 jaar internasionale eendagstatus verwerf en vir die Eagles hul plek in Wêreldbeker Liga 2 as deel van die kwalifiserende pad na die 2023 Wêreldbeker in eendagkrieket verseker het.Honderdtalle deur JP Kotzé (148 van net 86 balle, met 15 viere en nege sesse) en Stephen Baard (122 van 128 balle, 10x4 4x6) het Namibië op die wenpad geplaas. Latere vuurwerke in 'n onoorwonne vennootskap tussen JJ Smit (61* van 26 balle, 3x4 4x6) en Zane Green (41* van 21 balle) het die span se totaal tot 396/3 in vyftig boulbeurte opgejaag.Kotzé is as speler van die wedstryd aangewys, nadat ewe puik werk deur die Eagles se bouleenheid die Asiate vir 245 uitgeboul het vir 'n roemryke sege met 151 lopies.Die volgende dag het Namibië ook die finaal van die kwalifiserende toernooi gewen deur met Oman af te reken.Gister was mnr. Johan Muller, uitvoerende hoof van Krieket Namibië, vol lof vir die leiding en ondersteuning wat die ICC gebied het, veral deur middel van sy Afrika-kantoor.“Om vir ODI-status én vir die T20 Wêreldbeker te kwalifiseer, is puik prestasies waarop ons besonder trots is. Die Eagles is tans in die top-20 op die wêreldranglys in beide T20- en eendagkrieket.“Die krediet hiervoor moet gaan aan elke administrateur, raadslid en speler wat oor die laaste twintig jaar die spel bevorder en gekoester het. Die bestuur onder leiding van dr. Rudie van Vuuren as president se beplanning het vrugte afgewerp. Hulle het nie net skuld afbetaal om die beheerliggaam tans in 'n skuldvrye posisie te laat nie, maar hul werk op die ontwikkelingsvlak en met die aanstelling van afrigters was baie suksesvol.”Muller het uitgewys dat die ICC altesame 92 assosiaatlande het, wat die prestasie as 'n mylpaal in perspektief plaas.In sy reaksie het die Eagles se kaptein, Gerhard Erasmus, gesê die spelers en afrigtingspan onder die merkwaardige leiding van Pierre de Bruyn is besonder trots op gister se erkenning.“Daardie April-toernooi was die begin van ons vestiging van 'n nuwe spankultuur onder nuwe afrigting. Dié was tevore vir ons 'n baie moeilike toernooi en die uitslag was dus 'n baie spesiale oomblik voor ons tuisondersteuners. Dit het die sukses aan die brand geskop wat ons die afgelope twee jaar beleef het.”

Roemryke sege beklink ICC-prys

Kommentaar

Republikein 2026-07-21

Meld asseblief aan om kommentaar te lewer

Roemryke sege beklink ICC-prys

Kommentaar

Republikein 2026-07-21

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.