Rioolvuil- en waterbesmetting vererger Indonesië-ramp

Siektes kan in die rampgeteisterde Indonesië waar 5 000 mense reeds in die massiewe aardbewing en tsoenami gesterf het, begin versprei soos wat lyke ontbind en siek mense met wonde en beserings al sieker word.Daarom gaan mediese hulp en medisyne vorentoe net al hoe belangriker raak, want infrastruktuur soos riool- en waterstelsels wat tot niet is, kan ook tot die besmettings bydra.Só sê Ahmed Bham, spanleier van Suid-Afrika se Gift of the Givers se soek- en noodreddingspan – die grootste internasionale noodlenigingspan van alle lande wat nou na Palu op die eiland Sulawesi is om te gaan help.Die massiewe aardbewing en tsoenami het op 28 September groot verwoesting gesaai en bykans alles platgevee.Bham sê die dodetal na die aardbewing en tsoenami is reeds 5 000 en dit gaan nog geweldig styg soos wat lyke in afgeleë gebiede wat tot dusver onbereikbaar was, uit bourommel en modder gehaal word.“Die verrotting kan reeds in die lug geruik word en dit is beslis ongesonde omstandighede wat hier aan die gang is, waar die menslike lyding ná die rampe ’n mens met skok en afgryse vervul.”Bham sê die Suid-Afrikaanse span van Gift of the Givers bestaan uit 27 mense waaronder vyf dokters, ’n wondsorg-verpleegspesialis, adviserende lewensondersteunende mediese beamptes, en soek- en noodreddingswerkers.“Die Suid-Afrikaanse span is die grootste internasionale span wat daarheen gestuur is om hulp te gaan aanbied. “Lande soos Duitsland en Spanje het byvoorbeeld ook sulke spanne na die rampgebiede gestuur. Indonesiërs het nou vir eers gevra dat die internasionale gemeenskap nie nog mense sal stuur nie, omdat daar nou genoeg hulp gekom het.”Bham sê die Suid-Afrikaners sal sy aan sy met die plaaslike dokters en soek- en noodreddingswerkers, asook dié van ander lande saamwerk om in die rampgeteisterde gebiede na nog meer verlore mense en kinders te soek.“Oorlewendes sal medies en met materiële bystand soos kos, klere en verblyf, gehelp moet word,” sê hy.MEDIESE BEHANDELING“Ons het twee ton humanitêre materiële hulp uit Suid-Afrika saamgebring, terwyl daar nog 14 ton is – alles skenkings van die plaaslike bevolking van Indonesië en van ander lande – wat ons ook van Woensdag af met vragmotors na onder meer afgeleë plekke gaan help versprei.”Bham sê dié Suid-Afrikaanse span het ’n dag en ’n half gelede in die rampverklaarde gebiede van Indonesië aangekom. Hulle gaan hul bes doen om soveel moontlik lewens te probeer red en te help net waar hulle kan deur pyn te verlig met mediese behandeling en om kos en klere uit te deel.“Ons sal ook help om mense wat huise verloor het na strukture te vervoer, waar hulle ’n dak oor die kop kan kry,” sê Bham.Hy sê die grootste uitdaging in Indonesië was om toegang tot die rampgeteisterde eiland te kry en om by die nieregeringsorganisasie te registreer sodat daar saamgewerk kan word.“Baie van die afgeleë gebiede is tot dusver nog nie bereik nie, so die dodetal en hulpbehoewendes gaan beslis meer word wanneer dit gefynkam word.”Hy sê die impak van eers die aardbewing en toe die tsoenami is massief en dit gaan baie lank neem om mense se lewens te herbou wat al hulle aardse besittings en geliefdes verloor het.Bham sê van die Suid-Afrikaners sal van eerskomende Vrydag na Suid-Afrika begin terugkeer. – Netwerk24

Rioolvuil- en waterbesmetting vererger Indonesië-ramp

Kommentaar

Republikein 2025-09-19

Meld asseblief aan om kommentaar te lewer

Rioolvuil- en waterbesmetting vererger Indonesië-ramp

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie