Riaan Smit en die ShadowKatz is hier

Riaan Smit het met Vaughn Ahrens kragte saamgesnoer om ‘n Namibiese weergawe van sy band, die ShadowKatz, te vorm.

ShadowKatz, ’n psigedeliese ska- en surf-rockgroep, is oorspronklik deur Riaan begin en het by The River Rocks, die “mini-Camp Rock”, hul debuut gemaak.

Die groep hou op 31 Julie hul eerste optrede by The Wolfshack.

In ’n telefoniese onderhoud met Republikein het Vaughn verduidelik hulle musiek het ’n “reggae en gypsy-jazz”-klank.

“Ons wil mense op en af laat spring vir twee ure straight,” sê Vaughn

Die oorspronklike ShadowKatz is op die Cayman-eilande gebore, waar Riaan nog in November verlede jaar was. Hy het in Maart vanjaar terug na Namibië gekeer weens die uitbreking van die Covid-19-pandemie. Die groep het bestaan uit ’n saxofoonspeler van Kuba en ‘n trompetspeler van Argentinië. Die nuwe plaaslike orkeslede bestaan nou uit Vaughn Ahrens op die kitaar en die klawers. Hy gaan natuurlik ook saam met Riaan agter die mikrofoon inskuif. Adam Kirby is op tromme en Llewellyn Annandale op die baskitaar.

Die groep beplan nog projekte met die musikante Suzy Eises, Thetardius Munjano en Nina Burger.