Reusedwelmvonds gegryp

Tanja Bause - Die Namibiese polisie het die afgelope naweek 14 mense in verband met die besit van dwelms ter waarde van meer as N$302 000 in hegtenis geneem.Dít volgens hul misdaadverslag. Die Namibiese polisie het Vrydag om 11:45 sowat 290 g skunk (dagga) ter waarde van N$14 500 in 'n huis by Blok E op Rehoboth gevind. Ses mans tussen die ouderdom van 17 en 29 is in hegtenis geneem. Vrydag om 18:30 is 'n 44-jarige man op Soetdoringlaagte op Stampriet in die besit van 19 “ballies” dagga in hegtenis geneem. 'n Man (21) is by die Green Bakery in Aimablaagte op Mariental in verband met die besit van N$50 se dagga in hegtenis geneem. Nog 'n man (25) is glo in besit van dagga ter waarde van N$10 tydens dieselfde polisie-operasie in hegtenis geneem. 'n Ses-en-twintigjarige man is Vrydag by die rivierplotte buite Swakopmund in hegtenis geneem. Hy is na wat verneem word in besit van 13 daggaplante ter waarde van N$300 gevind ná die polisie sy huis deursoek het. Saterdag is 'n 18-jarige man in Narraville in hegtenis geneem nadat die polisie hom deursoek het en een Mandrax-tablet, agt halwe Mandrax-tablette en 10 banksakkies dagga ter waarde van N$600 glo by hom gevind is.Twee verdagtes is Sondag omstreeks 18:50 by die Klein Mannase-grenspos by Aroab in hegtenis geneem. Hulle het glo 23 banksakkies dagga ter waarde van N$1 150 by hulle gehad. Die verdagtes is 21 en 40 jaar oud. Donderdag het die polisie glo op 2 990 kg se dagga ter waarde van N$29 090 in die Ruhuga-nedersetting in die Kavango-Wesstreek beslag gelê. Dít terwyl dit na bewering in 'n kano van Angola af na Namibië vervoer is. 'n Namibiese man (36) is in hegtenis geneem, terwyl sy vermeende Angolese medepligtige weggehardloop het. Hy is nog nie in hegtenis geneem nie. Vermeende verkragtings 'n Seun (18) verkrag sy 10-jarige suster glo herhaaldelik sedert 2014. Dít het na bewering in die Oneheke-nedersetting in die Omusatistreek afgespeel. Die seun is in hegtenis geneem. Vrydag is 'n meisie (10) in die Ipanda-nedersetting in die Ogando-kiesafdeling glo deur 'n seun (18) verkrag. Die verdagte is aan die polisie bekend, maar is nog nie in hegtenis geneem nie. Volgens die polisie het 'n man sy vrou Vrydag glo ná 'n bakleiery verkrag en toegesluit. Die klaer was glo die hele naweek toegesluit en het Sondagaand ontsnap. Die verdagte is nog nie in hegtenis geneem nie. Omkopery Saterdag omstreeks 15:30 het 'n 39-jarige Tanzaniese burger glo probeer om die immigrasiebeamptes by die Klein Manasse-grenspos by Aroab om te koop. Die beamptes het glo agterdogtig geraak en vermoed die verdagte wou 'n voertuig die land insmokkel, wat in die buiteland geregistreer is.Tydens ondervraging het die verdagte die beampte na bewering N$1 000 in kontant aangebied. Die man is in hegtenis geneem. Nog 'n Tanzaniese burger is Saterdag om 17:10 by die Schwer Court op Robert Mugabeweg in hegtenis geneem ná hy glo probeer het om polisiebeamptes om te koop. Die verdagte was na wat verneem word in die besit van 13 pakkies dagga ter waarde van N$256 800. Hy het glo probeer om die polisiebeampte, wat hom in hegtenis geneem het, met N$15 400 om te koop. Ná sy inhegtenisname is glo op N$3 100 se kontant beslag gelê.

Reusedwelmvonds gegryp

Kommentaar

Republikein 2025-05-06

Meld asseblief aan om kommentaar te lewer

Reusedwelmvonds gegryp

Kommentaar

Republikein 2025-05-06

Meld asseblief aan om kommentaar te lewer

MELD AAN

Advertensie