Reuse-uraanbron ontdek

Augetto Graig - Die gebruik van Google Earth het die opspoor van 'n reuse-uraanafsetting vergemaklik, en was deel van 'n vinniger eksplorasie-metode wat 'n Namibiese wetenskaplike ontwikkelingsmaatskappy toegepas het. Die mineraalafsetting is tussen die wêreldberoemde uraanmyne Rössing en Swakop Uranium se Husab-myn in die Namibwoestyn geleë. Die Science and Development-maatskappyegroep (SD Group) van dr. Elias (Charlie) Shanyengana is tans op soek na vennote om so spoedig moontlik 'n splinternuwe myn te ontwikkel wat Namibië 'n hupstoot sal gee om die top- uraanbron ter wêreld te word. Shanyengana sê dié ontdekking behels maklik bereikbare oppervlakkige erts in die heuwels op die terrein, sowel as ondergrondse erts wat tot 86 000 ton uraanoksied (U3O8) kan oplewer. Dit ná net 60% van die lisensiegebied ondersoek is. Hoëgehalte erts, asook die gemak waarmee die geaffilieerde maatskappy Namibia Uranium Corporation (NUC) se myn ontwikkel kan word danksy bestaande water-, krag-, pad- en spoorinfrastruktuur, sal merkwaardige volumes uitvoeruraan vinnig en goedkoop lewer, sê hy. Volgens Shanyengana sal die myn uraan teen 'n veel laer koste per pond kan lewer as die huidige wêreldwye markpryse. Dit kan die land se status wat uraanproduksie betref, binne twee of drie jaar versterk.Wetenskaplikes wat NUC genader het, is oortuig daarvan dat meer van dié bron in die gebied gevind sal word en gesprekke word reeds gevoer om met aangrensende lisensiehouers saam te werk. As ooreenkomste met Olundjinda, EPL 6298 en Bannermann bereik kan word, sal die myn toegang tot meer as 400 000 ton uraan kan verseker, wat dit as een van die drie grootste uraanmyne ter wêreld sal vestig. Indien erts aanvanklik na Rössing en Swakop Uranium se prosesseringsaanlegte geneem kan word, kan die myn selfs vinniger ontwikkel.Dit sou surpluskapasiteit by die bestaande myne gebruik en genoeg geld genereer om verdere ontwikkeling te finansier, sê Shanyengana.Ondanks die huidige swak uraanprys en die Verenigde Nasies se voorspelling van 'n wêreldwye uraantekort binne die volgende 30 jaar, sal die myn steeds 'n wins kan maak danksy meer bekostigbare produksie, sê hy. Nog 'n pluspunt is die ontdekking van vulkaniese sulfiederts wat gebruik kan word om swaelsuur te vervaardig, wat alle uraanmyne benodig, sê Shanyengana. Dit maak die NUC-myn potensieel selfonderhoudend. Shanyengana en sy NUC-vennoot, mnr. Frans Mushimba, sal vandeesmaand self die tweede eksplorasiefase finansier en voortsit. Shanyengana sê die feit dat die ontdekking deur Namibiërs gemaak is, die projek 100% deur Namibiërs besit word, en dat die tegnologie wat gebruik word vrylik beskikbaar is, is 'n aanduiding dat plaaslike bevolkings minerale rykdom self kan ontdek en benut. Soortgelyke projekte kan in ontwikkelende lande gebruik word om ekonomiese bevryding van burgers te bevorder, sê hy.Shanyengana het in 2016 op Amazon 'n boek, Leapfroggin Socio-economic and sustainable industrial emancipation of developing nations vrygestel oor sy idees vir spoediger menslike ontwikkeling deur plaaslike vennootskappe en die toepassing van tegnologie.

Reuse-uraanbron ontdek

Kommentaar

Republikein 2025-12-17

Meld asseblief aan om kommentaar te lewer

Reuse-uraanbron ontdek

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.