Reuse- goudvonds gevind

Augetto GraigOsino Resources is 'n eksplorasiemaatskappy wat onlangs 'n reusegoudneerslag tussen die Otjikoto- en Navachab-goudmyn ontdek het. Die maatskappy wat in Suid-Afrika bestuur en uit Kanada gefinansier word, het ook die Otjikoto-neerslag ontdek en dit aan B2Gold, 'n Kanadese mynboumaatskappy, verkoop. Otjikoto is nou een van B2Gold se belangrikste goudmyne ter wêreld. Volgens mnr. Heye Daun, uitvoerende hoof en medestigter van Osino, dui boorresultate die teenwoordigheid van 60 ton goud of meer op hul eksklusiewe prospekteerlisensiegebied, Twin Hills. Die boorprojek word deur Kanadese beleggers gefinansier en is die resultaat van bedrywighede wat reeds in 2016 en 2017 begin het. In Januarie vanjaar kon Osino weer ongeveer N$200 miljoen invorder deur 'n derde keer aandele te verkoop. “Die sleutel is finansiering aangesien eksplorasie baie boorwerk vereis,” sê Daun.Die resep agter dié junior waagkapitaalmynboumaatskappy se sukses is, “teksboek eksplorasie met innovasie en ondervinding,” sê hy. “Sukses is ontdekking aangesien dit die aandeelprys opstoot,” sê hy. Daun se hoofdoel is om aandeelwaarde vir aandeelhouers te verhoog. 'n Deurbraak het gekom met die aanneem van die wetenskaplike benadering tot mineraalontdekking wat Australië se Commonwealth Scientific and Industrial Research Organisation (CSIRO) ontwikkel en hul toepassing van geowetenskaplike data-ontleding. “Ons het dit net ingevoer en vir plaaslike omstandighede aangepas,” sê hy. Die vonds is op die bekende Damara Belt- geologiese mineraalgordel ontdek, waar sand en kalk ongeveer 20 meter diep bo die rots lê. Dit sal nog 'n paar jaar neem voor mynboubedrywighede sal begin, maar volgens Daun sal dit heel moontlik 'n oopgroefmyn wees. Gevra of Osino die moontlike myn sal verkoop, sê hy die mikpunt is om “waarde te skep, deur verkoop of vennootskap, maar beslis om waarde by die aandeelprys te voeg,” sê hy. “Ons gaan iewers heen met dié projek,” sê Daun, veral omdat die ontdekking in Namibië gemaak is. Namibië is die Switserland van Afrika in terme van mynbou, sê hy. “Mynboureëls is nog dieselfde sedert onafhanklikwording; ons weet wat die reëls is en kan daarop staatmaak. My ouers boer ook in die omgewing,” sê hy. Die internasionale goudprys is tans hoog en dit skep 'n positiewe omgewing, sê hy. “Die gety draai, ook vir die juniors,” sê Daun.– augetto@republikein.com.na

Reuse- goudvonds gevind

Kommentaar

Republikein 2025-06-16

Meld asseblief aan om kommentaar te lewer

Reuse- goudvonds gevind

Kommentaar

Republikein 2025-06-16

Meld asseblief aan om kommentaar te lewer

MELD AAN

Advertensie