Reparasies: 'n Blik op die ooreenkoms
Besonderhede van die ooreenkoms tussen Namibië en Duitsland oor reparasies vir koloniale volksmoorde is onder die vergrootglas.
Toivo Ndjebela
Sewe Namibiese streke – Erongo, Hardap, ||Kharas, Khomas, Kunene, Omaheke en Otjozondjupa – is uitsluitlik geïdentifiseer vir unieke ondersteuningsprogramme vir heropbou en ontwikkeling as deel van die nuwe ooreenkoms tussen Duitsland en Namibië oor reparasies vir koloniale volksmoorde.
Sodanige ontwikkeling sal grondverkryging binne die raamwerk van die Namibiese Grondwet insluit, asook grondontwikkeling, landbou, landelike lewensbestaan en natuurlike hulpbronne, landelike infrastruktuur, energie- en watervoorsiening en tegniese en beroepsgerigte onderwys en opleiding.
Dít volgens die gesamentlike verklaring tussen dié twee regerings, wat Republikein se susterkoerant Namibian Sun onder oë gehad het, en waarop die eerste minister, me. Saara Kuugongelwa-Amadhila, na verwagting vandeesweek in haar openingsrede aan die parlement sal fokus.
Terwyl die N$18,6 miljard wat tussen dié twee regerings ooreengekom is, geoormerk is vir “ondersteuningsprogramme vir heropbou en ontwikkeling ten bate van die afstammelinge van die gemeenskappe wat veral geraak is”, sal 'n bykomende N$838 miljoen aan projekte gemik op versoening, nagedagtenis, navorsing en opvoeding bestee word, luidens die verklaring.
“Die beheer- en implementeringstrukture vir albei programme sal op die beginsels van gelyke vennootskap, gesamentlike besluitneming, goeie bestuur en deursigtigheid, sowel as gemeenskapsbetrokkenheid gebaseer word,” lui die dokument verder.
Beide Namibië en Duitsland het saamgestem hierdie bedrag sal alle finansiële aspekte rakende die koloniale volksmoord-verwante kwessies dek, hoewel gemeenskappe verlede week gevra het daar moet weer oor dié bedrag besin word.
Bronne binne die Namibiese regering het verlede week aan Namibian Sun gesê die skikking is vir Namibië 'n belangrike politieke oorwinning, veral die feit dat Duitsland erken het die gruweldade wat tot 85 000 sterftes gelei het kan as volksmoord beskou word.
Namibiese gemeenskappe wie se familielede deur die koloniale Duitsland afgemaai is, eis reparasie van N$8 triljoen (N$8 000 000 000 000) en sê dit sal nie net as vergoeding vir verlore lewens dien nie, maar ook vir verlore grond.
Die verklaring self het toegegee “groot dele van die grondgebied wat die voorvaderlike land uitmaak wat histories bewoon is deur en behoort het aan inheemse gemeenskappe, is in die nasleep van die oorlog deur die Duitse staat beset”.
“Hierdie dade het gelei tot die verdrywing en verdringing van inheemse gemeenskappe van hul voorvaderlike grond. In sommige gevalle is gemeenskappe uit die hedendaagse Namibië gedwing en is hulle tot vandag toe ontwortel.”
Daar word geglo dat meer as 15 miljoen hektaar grond van die Ovaherero- en Nama-gemeenskappe afgevat is, en baie van dié grond vandag beset word deur afstammelinge van Duitse kolonialiste, wat nou Namibiërs is.
'oorskot onwettig verwyder'
“Verder is menslike oorskot van lede van inheemse gemeenskappe onwettig verwyder en na Duitsland gestuur vir pseudowetenskaplike rassesuiwerheid- en eugenetiese 'navorsing' sonder respek vir menswaardigheid, of kulturele en godsdienstige oortuigings en praktyke,” lui die verklaring.
“Die besendings het ook kulturele artefakte van hierdie gemeenskappe ingesluit. Oor die algemeen is tienduisende mans, vroue en kinders onderwerp aan die wette en gepaardgaande Duitse beleide. Hulle is geskiet, opgehang, verbrand, uitgehonger, onderwerp aan eksperimente, as slawe aangehou, doodgewerk, misbruik, verkrag en verdryf – nie net van hulle grond, eiendom en vee nie, maar ook van hul regte en waardigheid.”
Dit lui voorts dat 'n “groot aantal van die Damara- en San-gemeenskappe ook uitgeroei is”.
“Op dieselfde grondslag aanvaar Duitsland 'n morele, historiese en politieke verantwoordelikheid om om vergifnis te vra vir hierdie volksmoord en daarna die nodige middele vir versoening en heropbou aan te bied.”
Volgens die verklaring sal 'n tweenasionale kommissie op die been gebring word om 'n blywende politieke raamwerk vir die verstewiging van verhoudings tussen Duitsland en Namibië te bewerkstellig.
- [email protected]
Sewe Namibiese streke – Erongo, Hardap, ||Kharas, Khomas, Kunene, Omaheke en Otjozondjupa – is uitsluitlik geïdentifiseer vir unieke ondersteuningsprogramme vir heropbou en ontwikkeling as deel van die nuwe ooreenkoms tussen Duitsland en Namibië oor reparasies vir koloniale volksmoorde.
Sodanige ontwikkeling sal grondverkryging binne die raamwerk van die Namibiese Grondwet insluit, asook grondontwikkeling, landbou, landelike lewensbestaan en natuurlike hulpbronne, landelike infrastruktuur, energie- en watervoorsiening en tegniese en beroepsgerigte onderwys en opleiding.
Dít volgens die gesamentlike verklaring tussen dié twee regerings, wat Republikein se susterkoerant Namibian Sun onder oë gehad het, en waarop die eerste minister, me. Saara Kuugongelwa-Amadhila, na verwagting vandeesweek in haar openingsrede aan die parlement sal fokus.
Terwyl die N$18,6 miljard wat tussen dié twee regerings ooreengekom is, geoormerk is vir “ondersteuningsprogramme vir heropbou en ontwikkeling ten bate van die afstammelinge van die gemeenskappe wat veral geraak is”, sal 'n bykomende N$838 miljoen aan projekte gemik op versoening, nagedagtenis, navorsing en opvoeding bestee word, luidens die verklaring.
“Die beheer- en implementeringstrukture vir albei programme sal op die beginsels van gelyke vennootskap, gesamentlike besluitneming, goeie bestuur en deursigtigheid, sowel as gemeenskapsbetrokkenheid gebaseer word,” lui die dokument verder.
Beide Namibië en Duitsland het saamgestem hierdie bedrag sal alle finansiële aspekte rakende die koloniale volksmoord-verwante kwessies dek, hoewel gemeenskappe verlede week gevra het daar moet weer oor dié bedrag besin word.
Bronne binne die Namibiese regering het verlede week aan Namibian Sun gesê die skikking is vir Namibië 'n belangrike politieke oorwinning, veral die feit dat Duitsland erken het die gruweldade wat tot 85 000 sterftes gelei het kan as volksmoord beskou word.
Namibiese gemeenskappe wie se familielede deur die koloniale Duitsland afgemaai is, eis reparasie van N$8 triljoen (N$8 000 000 000 000) en sê dit sal nie net as vergoeding vir verlore lewens dien nie, maar ook vir verlore grond.
Die verklaring self het toegegee “groot dele van die grondgebied wat die voorvaderlike land uitmaak wat histories bewoon is deur en behoort het aan inheemse gemeenskappe, is in die nasleep van die oorlog deur die Duitse staat beset”.
“Hierdie dade het gelei tot die verdrywing en verdringing van inheemse gemeenskappe van hul voorvaderlike grond. In sommige gevalle is gemeenskappe uit die hedendaagse Namibië gedwing en is hulle tot vandag toe ontwortel.”
Daar word geglo dat meer as 15 miljoen hektaar grond van die Ovaherero- en Nama-gemeenskappe afgevat is, en baie van dié grond vandag beset word deur afstammelinge van Duitse kolonialiste, wat nou Namibiërs is.
'oorskot onwettig verwyder'
“Verder is menslike oorskot van lede van inheemse gemeenskappe onwettig verwyder en na Duitsland gestuur vir pseudowetenskaplike rassesuiwerheid- en eugenetiese 'navorsing' sonder respek vir menswaardigheid, of kulturele en godsdienstige oortuigings en praktyke,” lui die verklaring.
“Die besendings het ook kulturele artefakte van hierdie gemeenskappe ingesluit. Oor die algemeen is tienduisende mans, vroue en kinders onderwerp aan die wette en gepaardgaande Duitse beleide. Hulle is geskiet, opgehang, verbrand, uitgehonger, onderwerp aan eksperimente, as slawe aangehou, doodgewerk, misbruik, verkrag en verdryf – nie net van hulle grond, eiendom en vee nie, maar ook van hul regte en waardigheid.”
Dit lui voorts dat 'n “groot aantal van die Damara- en San-gemeenskappe ook uitgeroei is”.
“Op dieselfde grondslag aanvaar Duitsland 'n morele, historiese en politieke verantwoordelikheid om om vergifnis te vra vir hierdie volksmoord en daarna die nodige middele vir versoening en heropbou aan te bied.”
Volgens die verklaring sal 'n tweenasionale kommissie op die been gebring word om 'n blywende politieke raamwerk vir die verstewiging van verhoudings tussen Duitsland en Namibië te bewerkstellig.
- [email protected]
Kommentaar
Republikein
Geen kommentaar is op hierdie artikel gelaat nie