Reënseisoen: Risiko vir droogte steeds hoog

Elvira Hattingh Boere moet bedag wees daarop dat die huidige reënseisoen steeds 'n hoë risiko vir droogte inhou, gegewe die onsekerheid, asook negatiewe vooruitsigte wat tans vir reën in Namibië bestaan.Veeboere word aangeraai om hul beskikbare weiding en veegetalle betyds te sinchroniseer – vóór die winter.'n Verdere aanbeveling is dat veeboere voorts tweeweekliks of maandeliks 'n opname moet doen van hoeveel dit gereën het en hoe hul weiding vergelyk sodat veegetalle betyds daarvolgens aangepas kan word. Die landbouweerkundige, mnr. Johan van den Berg, wat verbonde aan Santam Landbou is, het aan Republikein gesê hy wil nie die huidige weersomstandighede té negatief opsom nie, maar dit bly belangrik om realisties te wees.“Ek hoop ek is verkeerd,” het hy gesê. INDIESE OSEAAN VEROORSAAK DROOGTE“El Niño-toestande het eers in Oktober vanjaar begin ontwikkel, ná aanduidings aanvanklik was dat dit reeds teen Julie of Augustus sou begin. “Hoewel El Niño-toestande intussen ontwikkel het, word dit nog nie werklik met weerstelsels verbind nie. Die droogte wat ons tans ervaar, is te wyte aan ander faktore soos byvoorbeeld ongunstige toestande in die Indiese Oseaan,” het Van den Berg gesê. Volgens hom is daar in die kort termyn 'n skraal kans op reën net ná Kersfees, maar ook net oor die noordoostelike dele van die land.“Die groot onsekerheid en kommer is dat El Niño se uitwerking tussen Februarie en April kan inskop. “Hierdie is uiters belangrike maande vir landbou, want dit bepaal toekomstige landboutoestande van laatsomer tot die volgende somer – dwarsdeur die winter,” het hy gesê.ANDER FAKTOREVan den Berg sê 'n klein kans bestaan dat nog reën in Januarie en dalk Februarie kan val, voordat El Niño ten volle in werking is. “Dit is belangrik om te onthou die El Niño-weersverskynsel beteken nie áltyd droogte nie. “In ongeveer 30% van gevalle, of in drie uit tien jaar waartydens El Niño weerstoestande oorheers, kan goeie reën steeds voorkom. “Dít was byvoorbeeld die geval in die 1997-'98-reënseisoen, toe een van die sterkste El Niño-jare voorgekom het. Toe het dit in die tweede helfte van die seisoen redelik goed gereën. “Daar is dus ander faktore as El Niño wat reënval ook beïnvloed,” het hy gesê. Intussen het die Amerikaanse Weervoorspellingsentrum en die Internasionale Navorsingsinstituut vir Klimaat en Samelewing Donderdag weer 'n uitkykstatus uitgereik, waarvolgens die kans op 'n swak El Niño-weersverskynsel nou op sowat 90% staan. Na verwagting sal dit hierdie somer reeds ontwikkel met 'n 60%-kans om tot herfs volgende jaar voort te duur. Tog het neutrale Enso-toestande in November voortgeduur ten spyte van bo-normale seeoppervlaktemperature oraloor die ekwatoriale Stille Oseaan. Enso staan vir die El Niño- Suidelike Ossilasie klimaatspatroon. DAAR ÍS HOOPVan den Berg sê Suider-Afrika is tans naby aan die einde van 'n droogtesiklus wat sedert 2012 heers. “Dit is dus moontlik dat natter toestande binne die volgende jaar of twee kan begin voorkom. Die uitdaging is egter om dié seisoen te oorleef. “Verder moet onthou word veral seisoensvoorspellings is dikwels verkeerd. Dit verbeter waarskynlik ook nie en die uitwerking van klimaatsverandering bemoeilik dit verder. “Voorspellings gee slegs 'n aanduiding van wat verwag word. As dit nie saam met werklike toestande oorweeg word nie, kan dit méér misleidend wees as om na geen voorspellings te luister nie.”

Reënseisoen: Risiko vir droogte steeds hoog

Kommentaar

Republikein 2026-09-18

Meld asseblief aan om kommentaar te lewer

Reënseisoen: Risiko vir droogte steeds hoog

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.