Renosterstropery: Private plase loop deur

Francoise Steynberg - Nóg twee renosters is Saterdag op 'n private plaas in Sentraal-Namibië gestroop en minstens vier gewond.Dít volg presies agt dae dae nadat 'n renoster naby die hoofstad op 'n private plaas vir sy horings gestroop en nog een gewond is. "Een koei is met 'n jaggeweer vrekgeskiet en haar horings verwyder. Nadat 'n bulkalf se ma gewond is, het hy weens die stres sonder sy ma gevrek," het mnr. Jaco Muller van die private renosterbewaringsorganisasie, Help our Rhinos Now Namibia (HorN.nam), gesê. "Ten minste vier renosters is gewond, naamlik twee koeie, een bul en een jong vers. Die twee koeie is deur 'n veearts behandel, maar hul toestand is kritiek. Die ander twee behoort te oorleef," het Muller gesê.Hy sê boonop is 'n gewonde koei se vyf maande oue verskalfie vermis en daar is moontlik nog gewonde renosters, want mis met bloed in is op die plaas gevind. Muller het gister van die private plaas in Sentraal-Namibië met Republikein gepraat waar hy vanaf Maandag met sy girokopter die gewonde renosters help opspoor."Ons is hartseer en geskok," het hy gesê, "veral oor die verskalfie van 'n gewonde koei wat nog steeds vermis is".Muller sê die kalfie moet met 'n helikopter gesoek word omdat dit vanuit die helikopter met 'n pylgeweer verdoof moet word. DRIE IN HEGTENISHy sê die polisie was reeds op die toneel "en die goeie nuus is dat drie verdagtes reeds in hegtenis geneem is".Dié stropingsgeval volg nadat 'n renoster op 17 November 'n hanetree van Windhoek af gestroop en die horings verwyder is. Nóg een is gewond.Die land se renosterstropingsyfer vir vanjaar staan nou op 30, teenoor 2016 se 60.Met teenstropingseenhede en sekuriteit wat in die land se nasionale parke opgeskerp is om wildstropery te voorkom, word private plase en lodges met renosters toenemend geteiken. Muller het bevestig dat alle lede van HoRn.nam wat ook uit private renostereienaars bestaan, oor teenstropingspanne beskik. HoRn.nam sê op sy Facebook-blad dringende verandering is nou nodig: "As dooie renosters meer werd is as lewende renosters, gaan hulle nie oorleef nie." HoRn.nam meen die handel in renosterhoring moet spoedig gewettig word, voor dit te laat is. "Of jy vir of teen die wettiging van die handel in renosterhoring of 'n draadsitter is, lees meer en vergewis jouself van die voor- en nadele daarvan. Die voordele is baie meer as die nadele." HoRn.nam sê "ons het jou ondersteuning nodig om die die bewaarders van hierdie ikoniese spesies te ondersteun".

Renosterstropery: Private plase loop deur

Kommentaar

Republikein 2025-12-22

Meld asseblief aan om kommentaar te lewer

Renosterstropery: Private plase loop deur

Kommentaar

Republikein 2025-12-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.