Renosters: 162 in twee jaar gestroop

Francoise Steynberg - Tot dusver is 37 renosters vanjaar gestroop en 2015 se stropingsyfer van 90 het tot 125 gestyg. Dit bring die landwye totaal van gestroopte renosters die afgelope twee jaar op 162 te staan.Die rede vir die styging is volgens die minister van die omgewing en toerisme, mnr. Pohamba Shifeta, dat die nadoodse ondersoeke van die gestroopte renosters aandui dat 35 karkasse wat vanjaar gevind is, reeds in 2015 gestroop is. Die minister het gister tydens ’n nuuskonferensie in Windhoek bevestig van die 37 renosters wat vanjaar gestroop is, was 28 in die Etosha Nasionale Park, agt in die Kunenestreek en een op ’n plaas.Wat olifantstropery betref, is die amptelike syfers 31 vir vanjaar en 49 in 2015. Shifeta het verlede week ’n lugpatrollie in die Zambezistreek gedoen en drie olifantkarkasse gevind, waarvan een baie vars was, een sowat ’n maand oud en die ander een se tande was nie verwyder nie. “Meer lugpatrollies word in al die uithoeke van die Etosha en Bwabwata nasionale parke gedoen. Verlede jaar se stroping van 125 renosters het meestal in die eerste vier maande plaasgevind en die massa-inhegtenisnemings van verdagtes in Mei,” het Shifeta gesê.BORGTOG“In Augustus 2015 het nog renosterstropery plaasgevind toe van die verdagtes vrygelaat is. “Ons het samesprekinge met die aanklaer-generaal gehad om nie borgtog aan verdagtes toe te staan waar bewyse sterk is nie.”Shifeta meen indien verdagtes op borgtog vrygelaat word, streng borgtogvoorwaardes moet geld soos om drie keer per dag by ’n polisiekantoor aan te meld. “Die meeste van die verdagtes wat op borgtog vrygelaat is, herhaal die oortreding. Dit is baie frustrerend vir wetstoepassers op die grond.”Die minister sê sommige maande is piekmaande vir stropery en die taktiek is verander en nuwe strategieë is ingestel om te verseker dat stropingsyfers nie styg nie. “Voet- en lugpatrollies gaan meer intensief wees en ons gaan tegnologie vir opsporing instel. Ons gaan weer perdepatrollies hê, want die stropers kruip weg as hulle die helikopters hoor. Ons weet wie die sindikaatgroepe is en sommige van hulle kamp binne Etosha,” het Shifeta gesê. Wat skokkend is, is dat stropery in Etosha nie net aan die westekant plaasgevind het nie, maar ook aan die oostekant: “Gemeenskappe wat in Etosha naby die hek bly, het kriminele gehuisves. Die stropers is van die Kunenestreek, maar hulle is daarheen gestuur,” het Shifeta gesê. Elf verdagtes is in Junie en Julie in verband met renosterstropery in hegtenis geneem en drie in verband met olifantstropery.Voorts het die minister sy afkeur uitgespreek oor die onwettige jag van wild en het verwys na die tien gemsbokke, ’n koedoe en bergesebra wat mnr. Frank Bockmuhl op sy plaas Tsuvandes in die Outjo-distrik aan die hand van stropers verloor het. “Die ministerie fokus op teenstropery in noordelike Namibië, insluitende Etosha en Bwabata, maar ons bly beskikbaar om op plase oral in Namibië te help waar ons kan,” het Shifeta gesê. SEEKOEIEDie minister en ’n span van die direktoraat van wildlewe en nasionale parke het die naweek die Bamunu kommunale bewaringsgebied besoek om die huidige situasie van die seekoeie en krokodille in die Linyanti-rivierkanaal in die Zambezistreek vas te stel. “Daar is 300 seekoeie in twee poele van die kanaal wat steeds water het en diep genoeg vir seekoeie en krokodille is. Hulle is nie in onmiddellike lewensgevaar nie, maar daar moet wel spoedig opgetree word,” het Shifeta gesê.Hy het bevestig dat vyf seekoeie gevrek het weens bakleiery onder die bulle wat baie gebiedsgebonde is. “Twee boorgate gaan gesink word om water in die poele en rivierkanaal te pomp, drie tot vyf bulle gaan van kant gemaak word om bakleiery tussen hulle te verminder en hulle sal deurentyd gemonitor word,” het Shifeta gesê.

Renosters: 162 in twee jaar gestroop

Kommentaar

Republikein 2025-05-06

Meld asseblief aan om kommentaar te lewer

Renosters: 162 in twee jaar gestroop

Kommentaar

Republikein 2025-05-06

Meld asseblief aan om kommentaar te lewer

MELD AAN

Advertensie