Renosterbloedbad
Twee gestroop, twee gekwes
Francoise Steynberg - 'n Boer van Gobabis het Vrydagoggend op sy plaas op 'n slagveld afgekom toe vier van sy witrenosters in 'n bloedbad lê.
Die boer, mnr. Walter Kinnear van Walmaine Boerdery naby Gobabis, se groot teelbul en 'n volwasse, dragtige koei (albei sowat tien jaar oud) is gestroop en 'n jong bul en vers wat moontlik ook dragtig was, is swaar gewond.
"Geld is een ding, maar om my diere so te sien, was verskriklik. Die koei was besig om te kalf. Die trane het sulke wit merke gemaak soos dit uit haar oë uit geloop het," het Kinnear aan Republikein gesê.
"Die koei wat besig was om te kalf, is vyf keer geskiet. Omdat die renosters baie mak is, is hulle op kort afstand geskiet en die wonde is naby mekaar."
Die kaliber is onbekend, "maar dit lyk of semi-outomatiese of outomatiese vuurwapens gebruik is," het Kinnear gesê.
Die agtjarige vers wat gekwes is, is swaar gewond, maar volgens Kinnear is haar kanse om te oorleef 50:50.
"Die veearts gaan haar vir so drie tot vier dae oppas en monitor om doodseker te maak sy oorleef," het Kinnear gesê.
"Die jong bul wat gekwes is, het baie wonde, maar dit is net vleiswonde. Ons glo ons gaan hom deurgetrek kry."
Kinnear boer hoofsaaklik met eksotiese wild, asook bees. Hy het die renosters al baie lank. Hy was met vakansie by die see toe hy die slegte nuus hoor. Hy het Vrydag om 02:00 van die see af vertrek en omstreeks 08:00 op die plaas aangekom waar hy deur die gru-toneel begroet is.
Hy vermoed die stropery het Dinsdagnag of Woensdag voor die volgende voer plaasgevind. Die gebied waar die renosters loop, is 1 400 hektaar groot.
"Die renosters kry elke dag voer en ons tel hulle dan. As daar kort is, loop soek ons na hulle. Toe hulle Donderdag gevoer is, is gesien daar kort vier renosters. Die voorman is per radio laat weet en hy het eerste op die groot bul afgekom wat gestroop en se horings verwyder is," het Kinnear vertel.
Hy bedank almal wat Vrydag kom help het: "Jannie Swarts het met sy helikopter kom help en so baie mense was wonderlik."
Volgens Kinnear was die polisie al Donderdagaand op die toneel; Windhoek se polisie en lede van die ministerie van die omgewing en toerisme Vrydag omstreeks 10:00.
Daar is glo vier verdagtes en Kinnear vermoed van sy werknemers of voormalige werknemers was by die stropery betrokke. Teen gister was niemand nog in hegtenis geneem nie.
"Ons gaan ons sekuriteit nou opskerp," het Kinnear gesê.
Die boer, mnr. Walter Kinnear van Walmaine Boerdery naby Gobabis, se groot teelbul en 'n volwasse, dragtige koei (albei sowat tien jaar oud) is gestroop en 'n jong bul en vers wat moontlik ook dragtig was, is swaar gewond.
"Geld is een ding, maar om my diere so te sien, was verskriklik. Die koei was besig om te kalf. Die trane het sulke wit merke gemaak soos dit uit haar oë uit geloop het," het Kinnear aan Republikein gesê.
"Die koei wat besig was om te kalf, is vyf keer geskiet. Omdat die renosters baie mak is, is hulle op kort afstand geskiet en die wonde is naby mekaar."
Die kaliber is onbekend, "maar dit lyk of semi-outomatiese of outomatiese vuurwapens gebruik is," het Kinnear gesê.
Die agtjarige vers wat gekwes is, is swaar gewond, maar volgens Kinnear is haar kanse om te oorleef 50:50.
"Die veearts gaan haar vir so drie tot vier dae oppas en monitor om doodseker te maak sy oorleef," het Kinnear gesê.
"Die jong bul wat gekwes is, het baie wonde, maar dit is net vleiswonde. Ons glo ons gaan hom deurgetrek kry."
Kinnear boer hoofsaaklik met eksotiese wild, asook bees. Hy het die renosters al baie lank. Hy was met vakansie by die see toe hy die slegte nuus hoor. Hy het Vrydag om 02:00 van die see af vertrek en omstreeks 08:00 op die plaas aangekom waar hy deur die gru-toneel begroet is.
Hy vermoed die stropery het Dinsdagnag of Woensdag voor die volgende voer plaasgevind. Die gebied waar die renosters loop, is 1 400 hektaar groot.
"Die renosters kry elke dag voer en ons tel hulle dan. As daar kort is, loop soek ons na hulle. Toe hulle Donderdag gevoer is, is gesien daar kort vier renosters. Die voorman is per radio laat weet en hy het eerste op die groot bul afgekom wat gestroop en se horings verwyder is," het Kinnear vertel.
Hy bedank almal wat Vrydag kom help het: "Jannie Swarts het met sy helikopter kom help en so baie mense was wonderlik."
Volgens Kinnear was die polisie al Donderdagaand op die toneel; Windhoek se polisie en lede van die ministerie van die omgewing en toerisme Vrydag omstreeks 10:00.
Daar is glo vier verdagtes en Kinnear vermoed van sy werknemers of voormalige werknemers was by die stropery betrokke. Teen gister was niemand nog in hegtenis geneem nie.
"Ons gaan ons sekuriteit nou opskerp," het Kinnear gesê.
Kommentaar
Republikein
Geen kommentaar is op hierdie artikel gelaat nie